A Xunta impulsa en Sanxenxo a comercialización de Artesanía de Galicia a través dunha tenda efémera en colaboración coa marca D-Due
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- Durante os meses de xullo e agosto celebrarase a quinta edición da 'Summer Shop D-Due & Artesanía de Galicia', na que se poderán atopar pezas de 44 obradoiros artesanais galegos
- A tenda está aberta na rúa Luis Vidal Rocha, 7 B-D, en horario de 10,30 a 21,30 h., de luns a sábados, e de 11,00 a 15,00 h. os domingos
Sanxenxo (Pontevedra), 2 de xullo de 2025
A Consellería de Emprego, Comercio e Emigración, a través da Fundación Artesanía de Galicia, promove a comercialización da marca Artesanía de Galicia nunha unha nova edición da tenda pop up Summer Shop D-Due & Artesanía de Galicia, que se celebrará durante os meses de xullo e agosto na rúa Luis Vidal Rocha, 7, B-D, en Sanxenxo, en horario de 10,30 a 21,30 h, de luns a sábados, e de 11,00 a 15,00 h os domingos. Trátase dunha iniciativa coa recoñecida marca de moda D-Due, que busca dar visibilidade ao talento galego e á alta calidade da artesanía feita a man en Galicia, nun espazo compartido cunha firma téxtil con proxección internacional.
A colaboración entre Artesanía de Galicia e D-Due mantense dende o ano 2021, promovendo cada verán este escaparate singular no que conviven as coleccións da marca de moda coa creatividade de obradoiros artesáns galegos. Este 2025, participan 44 obradoiros inscritos na marca Artesanía de Galicia, que abranguen disciplinas como a cerámica, cestería, olería tradicional, madeira, xoiería, coiro, elaboración e reparación de redes, tecido, encaixe, coitelos, figuras con miga de pan (sanandresiños), gravado, bixutería, complementos, colareiras, estampaxe ou xoguetes.
Este mesmo ano, Artesanía de Galicia tamén colaborou con D-Due noutra tenda efémera no Hotel Santo Mauro de Madrid, onde se exhibiron pezas de oito obradoiros artesáns, ampliando así a proxección da marca fóra de Galicia.
D-Due
D-due é unha empresa téxtil con orixe no ano 1960, dirixida por Charo Froján e Alfredo Olmedo dende a década dos 90 e con sede en Rianxo. As súas coleccións e creacións artísticas son apreciadas internacionalmente por mercados tan exclusivos coma o xaponés, de feito, contan con tenda propia en Aoyama, unha das zonas comerciais máis exclusivas de Tokio, dende o ano 2015. A difusión internacional de D-due consolidouse ao longo dos últimos anos coa súa presenza nunha ampla variedade das tendas e dos grandes almacéns máis exclusivos de Italia, Francia ou Corea do Sur entre outras cidades clave do panorama da moda mundial.
