Lete asegura que o regreso do Campionato de España de orientación en idade escolar a Galicia "ratifica á nosa comunidade como referente no deporte base"
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- O secretario xeral para o Deporte amosou o seu convencemento de que a celebración do campionato en Galicia axudará a incrementar as preto de 700 licenzas da federación galega, das que o 36% son de mulleres
Santiago, 11 de xuño de 2025
O secretario xeral para o Deporte, José Ramón Lete Lasa, participou na mañá de hoxe na presentación do Campionato de España de Orientación en Idade Escolar (CESA) que terá lugar do 20 ao 22 de xuño nos municipios galegos de Porto do Son e Santiago de Compostela, co apoio da Xunta de Galicia. Ademais, o 17 e o 18 de maio celebrouse o Campionato de España de Centros Escolares de Orientación (CECEO) en Pontevedra, impulsado tamén polo Goberno galego.
O mandatario galego, Lete Lasa, celebrou a nova de que o CESA de Orientación regrese a Galicia tras o seu paso en 2018 cando tivo lugar na Coruña con "grande éxito". Neste sentido apuntou que a decisión das federacións nacional e galega "ratifica á nosa comunidade como referente no deporte base". Cómpre subliñar que a orientación é unha das 38 federacións adheridas ao programa Xogade da Xunta de Galicia que xunta a oferta lúdica e deportiva, escolar e federada, para os rapaces e rapazas de entre 6 e 16 anos e que á fin da tempada pasada contaba co 60% dos escolares galegos inscritos.
Para Lete Lasa, "a orientación é un deporte que consiste en pensar, entender, elaborar estratexias e tomar decisións. Unha actividade realizada en pleno contacto coa natureza nada nos países do norte de Europa e que chegou a España nos anos 60 grazas ao ámbito militar". O secretario xeral apuntou a importancia destes valores para o desenvolvemento dos máis pequenos e enxalzou o escenario no que terá lugar a competición. "Porto do Son e Compostela son dous lugares míticos de Galicia que contan con dous dos maiores segredos da nosa cultura: o castro de Baroña e a Catedral de Santiago".
O CESA de Orientación será para os nenos e nenas de toda España "como percorrer un tramo deses camiños e Santiago que vertebran Europa co obxectivo de converterse en campións nacionais". Lete Lasa amosou tamén o seu convencemento de que a celebración do campionato en Galicia axudará a incrementar as preto de 700 licenzas da federación galega, das que o 36% son de mulleres.
