A Xunta reforza o compromiso coa visibilidade e dinamización das prazas de abastos no marco da celebración da campaña 'Quere o teu mercado'
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- O conselleiro puxo en valor a importancia desta iniciativa, á que Galicia se suma no marco do Plan estratéxico do comercio, que contribúe a dar visibilidade a estes espazos, atraer novo público consumidor e promover o produto galego de calidade
- A campaña conta coa participación de 63 prazas localizadas en 52 concellos de toda Galicia, entre eles catro da provincia de Ourense: O Carballiño, O Barco de Valdeorras, Ribadavia e Ourense, implicando a 2.550 praceiras e praceiros
- Salientou a resolución da orde de axudas para potenciar os mercados, con 31 municipios beneficiados, tres na provincia de Ourense: Ribadavia, Xinzo de Limia e O Carballiño, que contarán con apoio autonómico para realizar melloras nestas espazos
- Lamentou a posición do Concello de Ourense na Praza nº1 ao non solicitar estas axudas, rexeitar o apoio da Xunta -1,4M€- para completar a reforma e agora pretender que esta sexa financiada polos praceiros, levando a situación a un camiño sen saída
Ourense, 31 de maio de 2025
O conselleiro de Emprego, Comercio e Emigración, José González, acompañado do delegado territorial da Xunta en Ourense, Manuel Pardo, e do director xeral de Comercio e Consumo, Gabriel Alén, visitou esta mañá as prazas de abastos do Carballiño e Ourense no marco da celebración da campaña Quere o teu mercado, unha iniciativa internacional á que Galicia se suma na xornada de hoxe en máis de 60 mercados de toda a Comunidade como parte do compromiso estratéxico da Xunta co fortalecemento das prazas de abastos como espazos fundamentais do comercio de proximidade e elementos vertebradores do territorio.
Durante a visita, o conselleiro puxo en valor a importancia desta campaña que contribúe a dar visibilidade aos mercados, atraer novo público consumidor e promover o produto galego de calidade. Destacou que as prazas de abastos non son só espazos de venda, senón tamén lugares de encontro e parte esencial da identidade dos municipios galegos. Nese sentido, salientou o traballo que está a realizar a Xunta a través do Plan estratéxico de comercio de Galicia, con actuacións específicas como o pulo ao selo Mercados Excelentes ou a futura iniciativa Prato de mercado que promoverá sinerxías cos mellores restaurantes das súas contornas.
A edición deste ano de Quere o teu mercado conta coa participación de 63 prazas de abastos localizadas en 52 concellos de toda Galicia, entre eles catro da provincia de Ourense —O Carballiño, O Barco de Valdeorras, Ribadavia e Ourense—, que suman arredor de 2.550 praceiras e praceiros implicados. Ao longo desta xornada, a Xunta distribuirá máis de 4.300 mandís e 18.250 bolsas de algodón nos mercados participantes. Ademais, desenvolveranse diferentes actividades de dinamización como showcookings, actuacións musicais, sorteos de cestas de produtos, obradoiros infantís e concursos de debuxo, contribuíndo así a crear un ambiente atractivo e participativo.
Impulso á rede de Mercados Excelentes
No mesmo marco de apoio a estes espazos comerciais, José González salientou a recente resolución da orde de axudas impulsada pola Xunta para dinamizar e modernizar as prazas de abastos e promover a súa certificación como Mercados Excelentes, cun investimento total de 3,2 millóns de euros que beneficiará a 31 concellos e 14 asociacións e federacións vinculadas a estes espazos. No caso da provincia de Ourense, están a acollerse a esta liña os mercados de Ribadavia, Xinzo de Limia e O Carballiño, cun investimento conxunto que supera os 260.600 euros. Estas achegas permitirán avanzar na redacción de proxectos técnicos e na execución de melloras estéticas e funcionais, dando continuidade ao traballo de diagnose realizado no ano anterior tamén co apoio da Xunta.
Un posicionamento completamente oposto ao adoptado polo Concello de Ourense na Praza de Abastos nº1. O actual goberno municipal, lamentou González, nin tan sequera solicitou estas axudas autonómicas, rexeitou a colaboración extraordinaria da Xunta -1,4M€- para completar a reforma do mercado e agora pretende que sexan os propios praceiros os que asuman esta actuacións para contar cunhas condicións mínimas de funcionalidade que teñen garantidas por contrato. Deste xeito o Concello está desatendendo as súas obrigas nun edificio municipal e, advertiu o conselleiro, leva a situación a un camiño sen saída para prexuízo dos centenares de postos de traballo que dependen, directa ou indirectamente, da Praza, dos máis de 3.000 clientes diarios do mercado e de toda a cidade.
Visita á praza do Carballiño
No marco da xornada de hoxe, o conselleiro de Emprego tamén visitou o mercado do Carballiño, que, ademais da distribución do material promocional, acolle unha exposición fotográfica dedicada ao mercado. José González destacou que a praza do Carballiño é un exemplo do potencial que teñen estes espazos cando contan co apoio e impulso necesarios de todas as administracións implicadas. Este mercado recibiu en 2024 unha axuda para a diagnose e, este ano, dispón dunha achega próxima aos 53.000 euros para avanzar no proxecto técnico e na execución das melloras estéticas e funcionais.
