As persoas emprendedoras seleccionadas na segunda edición do proxecto Fixar inician as súas estancias nos coliving Sende, Anceu e Islow
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- Ata o 15 de outubro 80 nómades dixitais realizarán estadías de 15 días nalgún destes tres espazos implicados neste proxecto, co que a Xunta de Galicia e a Asociación Cultural Sende impulsan o modelo dos colivings
- Entre as persoas seleccionadas hai profesionais da artesanía, o turismo, o deseño web, a fotografía, a arquitectura, o audiovisual, a sostibilidade ambiental, o benestar, a xestión cultural, a investigación en distintos sectores ou a educación, entre outros
- Sumaranse aos 60 participantes da experiencia piloto desta iniciativa, impulsada coa Asociación Cultural Sende, o que supón a creación dunha rede para conectar a estas 140 persoas emprendedoras
- Esta nova edición afondará en determinar potenciais negocios necesarios no ámbito comarcal e avanzará no aproveitamento de sinerxías locais coa Rede de Polos despregada por toda Galicia, que conta actualmente con 15 oficinas
Santiago de Compostela, 23 de maio de 2025
As persoas emprendedoras seleccionadas na segunda edición do proxecto Fixar co que o Goberno galego e a Asociación Cultural Sende impulsan o modelo dos colivings de persoas emprendedoras no rural inician as súas estadías nos espazos coliving implicados neste proxecto, que son Sende (Lobeira, Ourense), Anceu, (Ponte Caldelas) e iSlow, Laxe (A Coruña). Deste xeito, as 80 persoas participantes nesta edición beneficiaranse destas estadías de 15 días nos períodos que escollesen ata o 15 de outubro nalgún destes tres espazos.
Entre as persoas seleccionadas hai profesionais do ámbito da artesanía, o turismo, o deseño web, a fotografía, a arquitectura e distintas disciplinas artísticas. Tamén hai persoas relacionadas co audiovisual, a sostibilidade ambiental, o benestar, a xestión cultural, a investigación en distintas áreas, así como a educación.
Así, cos 60 participantes na primeira edición deste proxecto, estase creando unha rede para conectar a estas 140 persoas emprendedoras no rural galego. Nesta nova edición afondarase en determinar potenciais negocios necesarios no ámbito comarcal, de maneira que a súa posta en marcha poida ser beneficiosa para a persoa emprendedora e para a contorna, explorando as sinerxías locais e coa propia Rede de Polos despregada por toda Galicia, que conta actualmente con 15 oficinas activas.
Formación en emprendemento
As persoas beneficiarias da segunda edición de Fixar recibirán orientación e formación en áreas como a xestión de proxectos, estratexias de emprendemento e networking e ferramentas para desenvolver os seus negocios e iniciativas desde a contorna rural. O obxectivo é promover que amplíen a súa rede de contactos e mellorar a súa estratexia empresarial, entre outros aspectos.
De feito, a primeira edición deste proxecto permitiu consolidar unha comunidade activa que segue medrando tanto de xeito online como a través de eventos presenciais, coa celebración das denominadas Xuntanzas Fixar que fomentan o intercambio de experiencias e fortalecen as relacións entre os participantes do proxecto promovendo o desenvolvemento de novas ideas e proxectos no rural. Ademais, nelas afóndase no potencial do modelo coliving, que contribúe a facer fronte a retos como o demográfico ou a remuda xeracional. Tamén se creou un mapa para identificar e estudar os proxectos participantes, co obxectivo de que sexa unha ferramenta de investigación e conexión de oportunidades no territorio ao abeiro dos mesmos.
Esta iniciativa é unha das multiples medidas encadradas na estratexia global de emprendemento impulsada polo Goberno galego e á que se destinarán máis de 32 millóns de euros neste exercicio, con especial foco no emprendemento ligado ao territorio. Accións coma esta fixeron a Galicia merecedora do galardón como Rexión Emprendedora Europea 2025 polo labor á hora de potenciar proxectos que contribúan a fixar poboación nas catro provincias.
