Comezan as obras da nova residencia de maiores municipal de Laza financiadas na maior parte pola Xunta
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- Destínanse 1,2 millóns de euros á construción deste equipamento, que tamén conta co apoio económico da Deputación Provincial de Ourense
- Esta actuación forma parte do Plan de investimentos que está a facer o Executivo autonómico para reforzar a rede local de centros de atención ás persoas maiores
Estas imágenes pertenecen a Página Oficial de la Xunta de Galicia
Laza (Ourense), 23 de maio de 2025
O xerente do Consorcio Galego de Servizos de Igualdade e Benestar, Perfecto Rodríguez, visitou hoxe a parcela onde xa están en marcha os traballos de construción da nova residencia de maiores do concello, cuxo custo asume maioritariamente a Xunta. O Goberno galego destina 1,2 millóns de euros a esta actuación, que tamén conta co apoio económico da Deputación Provincial de Ourense.
Perfecto Rodríguez, que estivo acompañado do alcalde, José Ramón Barreal, explicou que este novo centro residencial é un da vintena de proxectos que o Goberno galego financia a cargo do Plan de investimentos para a construción, reforma ou ampliación de equipamentos de servizos sociais que dependen dos concellos. Este Plan contempla un investimento de 18,5 millóns de euros de fondos europeos do Mecanismo de Recuperación, Transformación e Resiliencia (MRR).
Ao respecto, o xerente do Consorcio sinalou que este Plan, acordado cos propios concellos a través da Federación Galega de Municipios e Provincias (Fegamp), suporá un reforzo sen precedentes da rede de recursos de proximidade para as persoas maiores: residencias, centros de día, vivendas comunitarias e centros sociocomunitarios. En total, permitirá a creación de 650 novas prazas públicas, tanto de atención residencial como diúrna, en localidades máis rurais e de menor poboación.
Creación de 24 prazas públicas
A nova residencia de maiores de Laza terá unha capacidade de 24 prazas e a súa titularidade e xestión dependerá do concello, que tamén se ocupa da execución das obras. O proxecto de obra que se está a desenvolver contempla unha edificación de planta baixa con tres áreas diferenciadas: a de acceso, a de dirección—administración e a residencial, que inclúe as habitacións e zonas de convivencia. Ademais, resérvanse espazos para servizos xerais (lavandería ou cociña, entre outros) e para atención especializada (despacho médico, sala de curas e enfermaría).
