A Xunta financiará máis obras de mellora na súa residencia e centro de día de Taboadela
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- Asinarase un novo convenio de colaboración co concello, que é o propietario da edificación, para executar a intervención, que ten un orzamento de case 50.000 euros
- Os traballos centraranse en reformas interiores do inmoble, despois de que o ano pasado se levara a cabo a impermeabilización das fachadas
Taboadela (Ourense), 2 de maio de 2025
A Xunta continuará coa mellora da súa residencia e centro de día en Taboadela, no que se desenvolverá unha nova actuación de cara a seguir aumentando a comodidade e o benestar das persoas maiores usuarias deste centro pertencente á rede pública do Consorcio Galego de Servizos de Igualdade e Benestar. O xerente deste ente autonómico, Perfecto Rodríguez, acompañado do alcalde, Álvaro Vila, visitou hoxe o equipamento para anunciar esta nova intervención, á que se destinarán preto de 50.000 euros.
Perfecto Rodríguez explicou que se asinará un novo convenio de colaboración co concello, propietario do inmoble, para financiar os traballos, que nesta fase consistirán en reformas interiores. En concreto, mellorarase a zona de lavandería, renovaranse as duchas en vestiarios, actuarase na rede de saneamento do edificio, instalarase un novo sistema de ventilación na planta soto e novos estores nas estancias de planta baixa. Tamén se procederá ao pintado interior das zonas de uso público.
Estas melloras súmanse as xa financiadas o ano pasado tamén polo Consorcio neste centro de maiores e que se centraron no exterior da edificación. Estas supuxeron a reforma da impermeabilización das fachadas para solucionar problemas de humidades e conseguir un mellor illamento térmico. Así mesmo, tamén se renovou o mobiliario coa instalación de camas articuladas.
Máis de 155.000 euros para renovar o centro
Estas dúas fases de obras de mellora deste servizo de atención residencial e diúrna, máis o novo mobiliario, supoñen un investimento por riba dos 155.000 euros. Esta contía é sufragada na súa totalidade pola Administración autonómica. Pola súa parte, o Concello, como propietario do inmoble, encárgase da execución dos traballos.
