Fabiola García destaca que a actuación coordinada permitiu que non se rexistrasen incidencias importantes nas residencias de maiores
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- A conselleira fixo fincapé en que se actuou en todo momento tendo en conta o benestar dos maiores e en colaboración con todos os axentes implicados
- Puxo en valor que se deu resposta a cada unha das necesidades rexistradas, como a xestión de ambulancias, o subministro de bombonas de osíxeno, a dotación de xeradores de electricidade e o subministro de combustible
- No caso concreto da residencia de Boqueixón destacou que a dirección do centro solicitou un reforzo de osíxeno para algúns dos usuarios, que se puido solucionar de xeito rápido
- Agradeceu o seu esforzo e compromiso á dirección das diferentes residencias, a todo o persoal, aos usuarios dos centros e ás súas familias
Boqueixón (A Coruña), 30 de abril de 2025
A conselleira de Política Social e Igualdade, Fabiola García, visitou esta mañá a residencia de maiores Santa Olalla en Boqueixón para comprobar a situación do centro tras o apagamento eléctrico xeral. Na visita, na que estivo acompañada polo alcalde do municipio, Ovidio Rodeiro, puxo en valor a actuación coordinada durante a xornada do luns e o feito de que non se rexistraron incidencias importantes nos centros residenciais de maiores de Galicia.
Fabiola García fixo fincapé en que se actuou en todo momento tendo en conta o benestar dos maiores e en coordinación con todos os axentes implicados. Deste xeito, explicou que a Xunta puxo en marcha unha serie de medidas entre as que destacou que o estrito control das necesidades de todas as residencias da comunidade, algo que foi posible grazas ao traballo conxunto con Protección Civil e os corpos e forzas de seguridade, aos que agradeceu o seu esforzo e compromiso.
Na visita á residencia, na que estivo acompañada polo director xeral de Maiores e Atención Sociosanitaria, Antón Acevedo, e pola directora do centro, Silvia López, a conselleira explicou que, seguidamente, foise dando resposta a cada unha das necesidades como a xestión de ambulancias, o subministro de bombonas de osíxeno, a dotación de xeradores de electricidade e o subministro de combustible.
No caso concreto da residencia de Boqueixón, destacou que a dirección do centro solicitou un reforzo de osíxeno para algúns dos usuarios, que se puido solventar reenchendo as bombonas necesarias. Ademais, a Consellería de Política Social e Igualdade e a dirección do centro estiveron en contacto para xestionar traslados de usuarios cando foi preciso.
Fabiola García quixo agradecer o seu esforzo e compromiso á dirección das diferentes residencias, ao persoal e aos usuarios dos centros. Tamén lembrou ás familias e aos concellos, que demostraron a súa colaboración en todo momento. Por último, a conselleira apostou por que "todos debemos aprender desta situación" e seguir traballando para que as residencias "continúen sendo espazos seguros, preparados e humanos, mesmo ante os imprevistos".
