A Xunta avanza co concello coruñés de Cee nos trámites para a reforma e ampliación da oficina de emprego deste municipio
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- Para iso, o concello cederá ao Goberno galego o local que acolle esta oficina de emprego, que na actualidade o Executivo autonómico ten alugado ao municipal, e un local na primeira planta do edificio contiguo a esta oficina
- Esta iniciativa enmárcase no proceso de modernización do Servizo Público de Emprego de Galicia e con ela contribuirase a seguir reforzando os servizos orientados a impulsar a empregabilidade das persoas da zona que abrangue esta oficina
- Os seguintes pasos serán formalizar a cesión das instalacións por parte do Concello de Cee á Xunta, a redacción do proxecto desta actuación, do que resultará a distribución final dos espazos, e posteriormente a licitación da obra
Santiago de Compostela, 26 de abril de 2025
A Consellería de Emprego, Comercio e Emigración avanza co Concello de Cee nos trámites para reformar e ampliar a oficina de emprego coa que conta este municipio, situada na rúa Domingo Antonio de Andrade coa finalidade de obter máis espazo para as funcións desta oficina que abarca o Servizo Público de Emprego de Galicia (SPEG) e o Servizo Público de Emprego Estatal (SEPE). Para iso, o concello cederá á Xunta o local que acolle esta oficina de emprego, que na actualidade o Goberno galego ten alugado ao municipal, e un local na primeira planta do edificio contiguo a esta oficina.
Esta iniciativa, para a que o Goberno galego conta cunha axuda estatal preto de 538.000 euros, enmárcase no proceso de modernización do Servizo Público de Emprego de Galicia e con ela contribuirase a seguir reforzando os servizos orientados a impulsar a empregabilidade das persoas da zona que abrangue esta oficina -Vimianzo, Camariñas, Carnota, Cee, Corcubión, Fisterra, Muxía, Dumbría, Mazaricos e Muros-. Entre estes servizos están, a xestión das ofertas ou da formación para o emprego ou a orientación en materia laboral.
O investimento destinado pola Xunta a esta actuación concretarase nos seguintes pasos, que entre eles serán o de formalizar a cesión das instalacións por parte do Concello á Xunta, a redacción do proxecto desta actuación, do que resultará a distribución final dos espazos, e posteriormente a licitación da obra.
Potenciación do SPEG
A futura rehabilitación desta futura oficina de emprego de Cee forma parte do proceso global de modernización do SPEG que está a impulsar o Goberno autonómico para consolidalo como un nodo público de empregabilidade, referente de innovación. Un ámbito ao que este ano a Consellería de Emprego, Comercio e Emigración destina máis de 8 M€. Nel inclúense accións como o reforzo do servizo de orientación laboral e prospección empresarial, obras de renovación nas oficinas de emprego en diferentes puntos de Galicia e melloras como o desenvolvemento da app de EMi, a ferramenta de intelixencia artificial dispoñible nas 54 oficinas de emprego galegas e galardoada pola Comisión Europea. Tamén a incorporación de novos caixeiros nas oficinas para a renovación das demandas de emprego, petición de cita previa ou outras xestións, co obxectivo de axilizar trámites.
