A Xunta impulsa máis de 70 actividades de divulgación para celebrar os Días Europeos da Artesanía 2025

Santiago de Compostela, 28 de marzo de 2025

Na semana do 31 de marzo ao 6 de abril Galicia súmase á celebración dos Días Europeos da Artesanía a través da programación de demostracións en vivo, visitas guiadas, talleres, exposicións e xornadas de portas abertas impulsadas por obradoiros inscritos en Artesanía de Galicia, asociacións e centros de divulgación da artesanía. Como cada ano, a Fundación Artesanía de Galicia é a encargada de coordinar as actividades que se organicen na nosa Comunidade e colabora ademais con máis de 70 actividades arredor do territorio.

Os Días Europeos da Artesanía é unha iniciativa que se desenvolve cada ano en diferentes países de Europa co obxectivo de divulgar os oficios artesanais entre a sociedade e amosar a súa enorme riqueza e singularidade. Baixo o lema Trazos de unión, búscase nesta edición resaltar os vínculos entre os profesionais da artesanía e os seus territorios e ofrecer eventos para que os interesados teñan a oportunidade de descubrir, coñecer, tocar e sentir a artesanía de cada lugar. O programa completo de actividades e toda a información sobre este evento pódese consultar na páxina web www.diasdelaartesania.es.

Actividades nas catro provincias

Na provincia da Coruña, a Xunta colabora con cinco iniciativas de divulgación de oficios artesanais. En Santiago de Compostela, Creativas Galegas realizará talleres en escaparates viventes entre o 31 de marzo e o 6 de abril centrados no traballo co coiro, o macramé, a calceta e a xoiería, coa participación dos obradoiros Dona Formiguinha, Mocao Artesanía, Malas Herbas, La con Agarimo e Laura Triñanes. Tamén na capital galega, os obradoiros de xoiería Brigantia Orfebres, Kinga Haudek e Noga Arts, xunto co obradoiro de coiro El taller de Fer, localizados na rúa de San Pedro, organizan unha actividade conxunta na que os participantes realizarán unha peza pasando polos catro obradoiros. Será os días 4, 5 e 6 de abril.

Na cidade da Coruña, apóiase a iniciativa Oficios en acción, organizada pola Asociación Galega de Artesáns o sábado 5 de abril no Centro Ágora. Ofreceranse un total de 12 talleres participativos a cargo dos obradoiros dedicados ao coiro Jatafarta e Coiraxe, Cuaderna Maestra (tecido dun tapiz), Mioco Deseños (pregado de libros), Casperlota (impresión téxtil con Hapa Zome), Artesanía Nía (bixutería); Mario López (reciclaxe de xoguetes); Lucecús (tecido cos dedos), A Feitura (xoiería); Víctor Ares (cerámica) e Códice (encadernación); unha demostración de talla de vidro a cargo de Corman; e un taller de cestería impartido por Julia de la Cal, gañadora do Premio Artesnaía de Galicia 2024.

Tamén o sábado 5 de abril terá lugar en Ponteceso un obradoiro de modelado en barro, a cargo do obradoiro Feituras, na Fundación Eduardo Pondal; e en Malpica de Bergantiños, a Asociación Olería de Buño organiza unha visita guiada aos fornos tradicionais que rematará na Casa do Oleiro para ter unha experiencia no torno tradicional dirixido por oleiros profesionais. Ese mesmo día, o Concello de Val do Dubra organiza o desfile Primavera da emigración dubresa, no que se exhibirán as pezas resultantes do taller impartido pola ourive Susi Gesto, acompañadas de cestería de artesáns locais.

Na provincia de Lugo, a Fundación colabora coa Asociación Os Muíños de Mondoñedo nun programa de dez talleres de cerámica, estampaxe, coiro, téxtil, cartón e fiado. As actividades serán do 31 de marzo ao 6 de abril a cargo dos obradoiros Esquina Atlántica, Estudio Estampa, Artesanía do Pasatempo, Ton Arenas, Péndulo, María Jul e Miratú. 

Na de Ourense, apóianse tres iniciativas, entre as que destaca a organizada pola Asociación de Artesáns de Ourense, que ten programado un total de doce actividades en diferentes espazos centrados na bixutería, na xoiería artística, na restauración, na cerámica e no coiro impartidos por María Aba, Mario López, Arte 3, Luciérnaga coiro e Olería do Batán. Tamén nesta cidade, a tenda Amodo ten programados catro talleres de bordado, xoiería, pintura e ourivería impartidos por Sopa de Nuez, Laura Triñanes, Acivro e Marica da Berza, que se desenvolverán do 31 de marzo ao 6 de abril. O 5 de abril, o Museo de Olería de Niñodaguia (Xunqueira de Espadanedo) organiza a V Fornada Tradicional de Niñodaguia nos antigos fornos de pedra.

Na provincia de Pontevedra a Xunta apoia outras tres iniciativas. Os días 5 e 6 de abril, a Asociación Galega da Cerámica e outras artesanías organiza a XI Mostrafeira de Gondomar. Tamén durante o sábado e o domingo, o Museo do Mar de Galicia (Vigo) acolle obradoiros participativos centrados na cerámica, no coiro, na pintura sobre tea e na estampaxe con Gyotaku a cargo de Carlos San Claudio, Peixe Nero, Media Lúa, Como pez en el agua e Peixesapop. No Centro Comercial A Laxe (Vigo), A Casa Rodante organiza talleres e exposicións de oficios como a cestería, o tecido, a encadernación, o papel ou a cerámica, a cargo dos seus creadores, que son usuarios da asociación Apamp.