A Xunta salienta a excelente acollida das novas achegas para impulsar o sector comercial galego, que xa recibiron preto de 500 solicitudes en tres dias

Ourense, 1 de marzo de 2025

O  conselleiro de Emprego, Comercio e Emigración, José González, acompañado do director xeral de Comercio e Consumo, Gabriel Alén, e da xerente da Fundación Artesanía de Galicia, Elena Fabeiro, visitou esta mañá dous establecementos da cidade —Confitería Miguel e AO Domini— co obxectivo de visibilizar a riqueza e o dinamismo do tecido comercial e artesanal ourensáns e poñer en valor as axudas que está a impulsar a Xunta para garantir a competitividade desta área prioritaria para a economía e para a vertebración do territorio. Neste senso, o conselleiro salientou o éxito da convocatoria de apoios aberta actualmente —e deica o vindeiro 26 de marzo— que promove a dixitalización, modernización e sustentabilidade do sector, e que xa recibiu preto de 500 solicitudes desde o pasado mércores, data na que abriu o prazo.

Durante a xornada, José González destacou que ambos negocios, cada un no seu campo, son a mostra perfecta de como debe ser o futuro do comercio, no que tradición e innovación se dan man, apostando polas tecnoloxías e as novas tendencias do mercado pero sen perder a esencia das tendas de proximidade nin renunciar ao valor do artesanal.

Asi, AO Domini —proxecto persoal de Lila Méndez adherido ao selo Artesanía de Galicia— aposta pola alta calidade no eido do interiorismo e do téxtil, promovendo ademais a posta en valor do traballo feito a man, como exemplifica a presente exposición que acolle o establecemento con pezas de Aitor Martínez, finalista nos Premios Artesanía de Galicia 2024. Pola súa banda, Confitería Miguel —apoiada polo Goberno autonómico o pasado ano no marco das axudas ao sector— é un exemplo paradigmático de remuda xeracional ao longo do seu máis de medio século de traxectoria, destacando pola súa capacidade de adaptarse aos novos tempos e ás necesidades dos clientes.

Neste contexto, o conselleiro salientou que para seguir fortalecendo este sector clave, a Xunta ten abertas na actualidade varias vías de axudas. Entre elas destaca a referida convocatoria dotada con preto de 4M€ e que contempla tres liñas compatibles entre si, orientadas á dixitalización do punto de venda, á mellora da imaxe e eficiencia enerxética do local e, como novidade, ao uso de embalaxes sustentables.

A ela súmanse outros apoios como os 2,5M€ para impulsar as actividades dos centros comerciais abertos da Comunidade, reforzando a súa excelencia e a súa capacidade de dinamización das contornas nas que se integran, e que pode pedirse ata o 19 de marzo, así como accións para o impulso da rede de Mercados Excelentes a través da nova orde de 3,3M€ publicada onte no Diario Oficial de Galicia (DOG). Este orzamento complétase con achegas específicas como a consignación de 1M€ para cofinanciar as obras da praza de abastos nº1 de Ourense.

Plan estratéxico de comercio

González destacou a prioridade da Xunta por avanzar en actuacións para incentivar o consumo e potenciar a actividade empresarial e comercial. Mostra deste esforzo é o o Plan estratéxico do comercio 2025-2030, que estará rematado no primeiro trimestre deste ano tras o proceso participativo desenvolvido nos últimos meses. Esta planificación incluirá tamén actuacións singulares como Vilas Vivas —un proxecto cuxo piloto se realizou o pasado Nadal en Ribadavia e que busca impulsar as cabeceiras de comarca a través de experiencias de comercio efémero— ou a reactivación dos Bonos Activa Comercio, con 5M€ orzamentados en 2025.

Co obxectivo de potenciar todas estas actuacións, financiadas exclusivamente con fondos propios —máis de 10,4 M€ en 2024—, o Executivo autonómico reitera a necesidade de sumar esforzos entre administracións, reclamando ao Estado que Galicia poida acceder a recursos Next Generation que o Goberno central reservou e que non está a executar.