A Xunta defende un feminismo inclusivo para sumar vontades no avance da igualdade entre mulleres e homes
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- Destaca o papel de pioneiras que tiveron galegas como Emilia Pardo Bazán, Rosalía de Castro e Concepción Arenal á hora de darlle voz ás mulleres
- Nesta edición distinguíronse aos tres institutos de investigación sanitaria de Galicia, á Asociación de Mulleres con Discapacidade (Acadar) e a Rosa Celia Otero Graña, impulsora da Asociación de Amas de Casa, Usuarios e Consumidores da Coruña
Estas imágenes pertenecen a Página Oficial de la Xunta de Galicia
A Coruña, 2 de outubro de 2024
A conselleira de Política Social e Igualdade, Fabiola García, avogou hoxe por un feminismo inclusivo que sume vontades para seguir avanzando nos dereitos das mulleres. Díxoo na gala de entrega das Medallas Emilia Pardo Bazán, coas que o Executivo autonómico recoñece o traballo en favor da igualdade de entidades e persoas, e que contou coa presencia do Presidente do Parlamento de Galicia, Miguel Santalices, e do conselleiro de Sanidade, Antonio Gómez Caamaño, entre outras autoridades da Xunta.
Na súa intervención, Fabiola García destacou o papel de pioneiras á hora de darlle voz ás mulleres que tiveron Emilia Pardo Bazán, Rosalía de Castro ou Concepción Arenal, unha tarefa que fixeron en soidade e coa que "abriron o camiño por onde hoxe transitamos", apuntou. Así mesmo, puxo en valor a traxectoria dos galardoados e galardoadas deste ano: os tres institutos de investigación sanitaria de Galicia, a Asociación de Mulleres con Discapacidade de Galicia (Acadar) e Rosa Celia Otero Graña, fundadora da Asociación de Amas de Casa, Usuarios e Consumidores da Coruña.
Na edición deste ano distinguiuse ao Instituto de Investigación Sanitaria de Santiago de Compostela, ao Instituto de Investigación Biomédica da Coruña (INBIC) e ao Instituto de Investigación Sanitaria Galicia Sur (IINGS) por seren exemplos da incorporación das mulleres ao mundo da ciencia, xa que os tres están dirixidos por mulleres o que converte a Galicia en referente neste sentido: só 11 dos 32 institutos deste ámbito que están en funcionamento en España están dirixidos por mulleres. Así mesmo, destácase que constitúen un exemplo da incorporación da perspectiva de xénero na investigación sanitaria.
Pola súa parte, o recoñecemento a Acadar responde ao seu traballo por todas as mulleres con discapacidade, pola defensa dos seus dereitos e pola mellora, en xeral, das súas vidas e benestar. Esta entidade sen ánimo de lucro constituíuse no ano 2009 por un grupo de mulleres que tiñan como obxectivos comúns conseguir a igualdade efectiva de oportunidades das mulleres galegas con discapacidade.
Por último, condecorouse a Rosa Celia Otero Graña, polo seu compromiso coa conquista de dereitos das mulleres, sobre todo as amas de casa. Ademais, participou activamente no Consello Galego das Mulleres e fundou unha Asociación de Empresarias e tamén unha entidade asistencial chamada Antonio Noche.
Condecoracións honoríficas
As Medallas Emilia Pardo Bazán foron creadas pola Xunta de Galicia no 2019 para o recoñecemento de accións relevantes desenvolvidas en prol da igualdade entre homes e mulleres. Concédense cada ano tres condecoracións de carácter honorífico e poden ser destinatarias persoas, colectivos, entidades ou institucións de carácter público e privado.
Os galardóns permiten realizar un recoñecemento público ás medidas desenvolvidas en Galicia en prol da igualdade efectiva, ao tempo que contribúen á sensibilización social, a dar máis visibilidade aos talentos e ás capacidades das mulleres e para que se recoñeza a traxectoria tanto vital como profesional de persoas e entidades comprometidas con erradicar a discriminación de xénero e coa construción dunha sociedade máis igualitaria.
Estes galardóns levan o nome de Emilia Pardo Bazán, muller precursora na defensa dos dereitos das mulleres e do feminismo, así como do acceso á educación das mulleres, ideas que trasladou á súa obra literaria.
