A Xunta avanza co encontro 'Ultreia' da provincia de Pontevedra no impulso do emprendemento mediante a suma de sinerxías e solucións conxuntas a novos retos

Vigo, 25 de setembro de 2024

O conselleiro de Emprego, Comercio e Emigración, José González, clausurou hoxe en Vigo o terceiro encontro do programa Ultreia Galicia Rexión Emprendedora, retos e solucións para un territorio intelixente, co gallo de seguir incentivando o emprendemento mediante a suma de sinerxías e solucións conxuntas para impulsar sectores estratéxicos. En compañía do secretario xeral de Emprego e Relacións Laborais, Pablo Fernández, e da directora xeral de Traballo e Economía Social, Marta Mariño, González felicitou ás empresas emerxentes pontevedresas que foron escollidas para sondar financiamento no Foro de investimento final que terá lugar a nivel galego, unha vez conclúa a última xornada provincial que terá lugar mañá en Lugo. 

Financiado pola Unión Europea a través do Plan de Recuperación, Transformación e Resiliencia, o programa Ultreia está a servir -dixo o conselleiro- para ir dando forma ao plan de acción de Galicia como Rexión Emprendedora Europea 2025. Nese senso, agradeceu a vontade dos novos negocios presentados por marcar a diferencia, avogando pola innovación, pola diversificación e polo impacto real no territorio. Tivo  unha mención nese contexto para o prioritario comercio local, ao que se buscará darlle un pulo -dixo- a través do novo Plan estratéxico do comercio de Galicia 2025-2030, que se prevé ter listo no primeiro trimestre do ano que vén.

Tamén se referiu de xeito especial á Confederación Empresarial de Pontevedra (COP), por guiar hoxe -aseverou- na identificación tanto das empresas emerxentes pontevedresas como dos retos dos sectores estratéxicos. Así, cómpre resaltar que se avanzou a nivel provincial no mapeo desas empresas e das persoas emprendedoras, dándolles soporte para que atopen financiamento. Tamén na diagnose dos sectores estratéxicos, dos seus retos e das súas empresas tractoras, localizando os axentes emprendedores de interese para converter cada provincia nun territorio intelixente. 

Cabe recordar que no programa Ultreia participarán -en total- 240 axentes do ecosistema emprendedor, máis de 160 empresas emerxentes, 40 empresas tractoras de relevancia en Galicia e mostraranse 16 casos de éxito. Tan só unha pequena mostra -dixo o titular de Emprego- de todo o que a nosa Comunidade pode ofrecer no eido do emprendemento, perseguindo xerar riqueza e emprego, dinamizar e vertebrar o conxunto do territorio e fixar poboación. 

Desde a Xunta, destacou, é fundamental tomar parte na coordinación de todo os axentes deste ecosistema emprendedor co gallo de potencialos e consolidalos. O conselleiro quixo facer un chamamento sobre todo ás novas xeracións, asegurando que cando apostan por facer realidade as súas ideas de negocio a través do emprendemento apostan non só polo seu futuro, senón tamén polo de Galicia. 

A xornada en Vigo 

A conferencia inicial da mañá correu a cargo de Edo Sadikovic, fundador do coliving Sende en Lobeira co que está a colaborar a Xunta para atraer nómades dixitais ao noso rural. Posteriormente, presentáronse diversos casos de éxito que deron paso logo a diversos proxectos de empresas emerxentes, entre os que se escolleron os que optarán a sondear financiamento no acto final a nivel galego.  

Xa pola tarde, avogouse polo intercambio de experiencias en diversas mesas de traballo: sobre o sector do metal e a mecánica, do mar e industria, sobre medio ambiente, enerxías renovables, loxística e construción. Tamén se falou de axudas a proxectos de emprendemento, de  ideas para o futuro deste ecosistema, de claves innovadoras como a tecnoloxía ou a Internacionalización e de retos de investimento.