A Xunta homenaxea aos galegos que emigraron a Venezuela polo seu labor para manter a galeguidade no exterior e ratifica a súa aposta polo retorno
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- José González agradeceu neste acto o traballo diario dos galegos no exterior para manter vivas as tradicións, música e historia galegas e remarcou o carácter referencial da Irmandade Galega de Venezuela
- Referiuse ao apoio da Xunta aos emigrantes galegos e lembrou que o programa Retorno Cualifica Emprego ofrece traballo de calidade aos que queiran volver a Galicia, cun plan específico dotado con axudas económicas para facilitar o regreso
Boborás (Ourense), 30 de xuño de 2024
O conselleiro de Emprego, Comercio e Emigración, José González, participou hoxe en Boborás (Ourense) na terceira edición da Xuntanza de Amigos de Venezuela-Galicia coa que se busca rendir un homenaxe a todas aquelas galegas e galegos que emigraron a este país recoñecendo o seu esforzo e traballo e o seu empeño para manter a galeguidade no exterior.
Trátase dunha celebración que tamén pon de manifesto unha unión que trascende fronteiras e xeracións e serve para seguir fortalecendo os vínculos entre Galicia e Venezuela.
José González agradeceu o labor diario dos galegos no exterior por manter vivas as tradicións, música e historia galegas e puxo en valor o traballo que se desenvolve na Irmandade Galega de Venezuela que definiu como un faro de galeguidade no exterior.
Referiuse tamén á celebración esta semana da Comisión Delegada do Consello de Comunidades Galegas, un órgano colexiado de representación permanente dos galegos asentados fóra de Galicia, que ao igual que a xuntanza celebrada hoxe en Boborás sirve para compartir historias e reforzar os lazos de unión.
O conselleiro, así mesmo, sinalou o compromiso da Xunta cos retornados galegos facilitando a súa integración, dun lado, e no regreso a Galicia dos que así o desexen, doutra parte. Neste senso, lembrou que o Goberno galego está a executar a Estratexia Retorna Galicia coa que se está a impulsar o regreso de 30.000 galegos do exterior.
Retorno Cualifica Emprego
Esta planificación conta cun investimento de 450 millóns de euros que inclúe medidas como o programa Retorno Cualifica Emprego co que a Xunta está a ofrecer emprego de calidade en Galicia e axudas económicas para favorecer o regreso.
En palabras do conselleiro, é un plan personalizado de cualificación e mellora da empregabilidade, que tamén ofrece formación complementaria que poida ser precisa para o posto de traballo ao que se opta e a formalización do correspondente contrato laboral.
"A galeguidade únenos e debe seguir xuntándonos fortalecendo os vínculos de unión e explorando novas vías de colaboración", apuntou González, quen, para rematar, agradeceu aos organizadores e participantes o facer posible a terceira edición da xuntanza, agardando que esta tradición continúe moitos anos máis.
Previa a súa intervención, o conselleiro fixo entrega de dous recoñecementos: a Pancho Moure, socio fundador da Irmandade Galega de Venezuela; e a José Monteagudo, ex director de Asistencia Social da Irmandade Galega de Venezuela.
