A Xunta investirá máis de 125.000 euros na creación do futuro punto de encontro familiar do Deza
Estas imágenes pertenecen a xunta.gal
- Este mesmo mes sairá a licitación pública a creación deste servizo que permitirá que as familias e os menores de idade non teñan que trasladarse ducias de quilómetros para realizar as visitas establecidas polo réxime xudicial
- Converterase no noveno centro destas características xunto cos xa existentes nas sete cidades e na comarca do Barbanza
- O Goberno galego avanza no seu propósito de chegar aos 14 PEF por toda a Comunidade e achegar así estes recursos ao maior número de familias posible
Lalín (Pontevedra), 8 de xuño de 2024
A conselleira de Política Social e Igualdade, Fabiola García, reuniuse co alcalde de Lalín, José Crespo, para analizar os retos futuros e inmediatos na mellora dos servizos sociais nesta localidade. Entre os asuntos tratados nesta reunión, atopouse a creación do futuro Punto de Encontro Familiar (PEF) do Deza que dará cobertura ás familias de todos os concellos desta comarca. O Goberno galego sacará este mesmo mes a licitación pública o impulso deste servizo por un importe superior aos 125.000 euros.
Será o noveno centro desta tipoloxía en toda a Comunidade xunto aos xa existentes nas sete cidades galegas e na comarca do Barbanza. Ademais, o Goberno galego impulsará novos centros nas principais comarcas galegas para favorecer que as familias e os menores non teñan que trasladarse ducias de quilómetros para facer as visitas establecidas polo réxime xudicial. O obxectivo é chegar aos 14 centros por toda Galicia e achegar así estes recursos ao maior número de familias posible.
Ademais da creación deste centro, a reunión entre a conselleira e o rexedor lalinense serviu para estudar a posibilidade de mellorar outros servizos sociais do concello para pequenos e maiores. Fabiola García destacou que o Goberno galego impulsa servizos de conciliación para nenos de 0 a 3 anos nas dúas escolas infantís públicas autonómicas deste concello e tamén atende as necesidades dos máis maiores a través do Bono coidado no fogar, que lles ofrece unha axuda económica de 5.000 euros ao ano para seguir sendo atendidos nas súas casas.