Una de las foodtruck de Galicia sabe amar acercan esta semana a Ferrol, Cariño y Cedeira la calidad de los pescados y mariscos gallegos

Unha das foodtrucks da campaña GALICIA SABE AMAR regresan esta semana a Ferrol e á comarca de Ortegal tras percorrer nos últimos meses distintos municipios de España vencellados co Camiño de Santiago para achegar a locais e visitantes a calidade dos peixes e mariscos galegos. Así o anunciou a delegada territorial, Martina Aneiros, que avanzou que desde mañá ata o venres 1 de setembro esta iniciativa da Consellería do Mar estará emprazada no peirao de Curuxeiras (Ferrol) en horario de 12,00 a 15,00 e de 18,00 a 21,00 horas.

A seguinte parada do itinerario desta campaña será o municipio de Cedeira o próximo sábado 2 de setembro. Concretamente o servizo estará localizado na praza do Peixe, no mesmo horario, para trasladarse ao día seguinte, o domingo 3 de setembro, a Cariño onde estará na Porta Pulida en horario de 12,00 a 15,00 e de 18,00 a 21,00 horas.

Aneiros animou a veciños e visitantes a consumir peixes e mariscos pois as súas propiedades nutricionais contribúen a unha vida máis saudable. "Con esta campaña, que chegou a preto de 230.000 persoas ata o momento, o Goberno galego pretende mostrar a versatilidade dos produtos do mar e poñer en valor o traballo que realizan os milleiros de profesionais da comunidade que traballan na extracción, produción, comercialización e transformación das distintas especies para a súa posta a disposición dos consumidores", destacou a delegada.

GALICIA SABE AMAR é unha campaña da Xunta de Galicia que nace no verán de 2021 para animar á cidadanía a través da retranca e dos dobres sentidos a consumir produtos do mar, impulsar a súa venda e poñer en valor o labor dos profesionais da pesca e do marisqueo.

Este ano a iniciativa sóbese ás catro rodas a través de catro foodtrucks que levan o sabor das rías galegas a máis de 250 municipios de toda España vinculados ao Camiño de Santiago. En cada parada os visitantes poden degustar algún dos 10 petiscos pensados para a campaña e realizados a base de produtos certificados do mar e da terra como o Berberecho de Noia, o Mexillón de Galicia, o bonito do norte ou os peixes e mariscos amparados polo selo de calidade pescadeRías.