A Xunta publica o decreto que regula o Rexistro galego sanitario de empresas e establecementos alimentarios e establece requisitos de hixiene na produción e comercialización

Santiago de Compostela, 27 de agosto de 2025

O Diario Oficial de Galicia publica, na súa edición de hoxe, un decreto da Consellería de Sanidade polo que se regula o Rexistro galego sanitario de empresas e establecementos alimentarios (Regasa) e se establecen os requisitos de hixiene na produción e comercialización para determinados establecementos.

Con este decreto, a Xunta actualiza o catálogo de actividades recollidas neste rexistro, coa principal novidade da incorporación á definición de establecemento de comercio polo miúdo dos locais ambulantes ou provisionais, como é o caso das carpas, postos e vehículos de venda ambulantes, os almacéns de apoio e as instalacións en que, con carácter principal, se realizan operacións de venda á persoa consumidora final. Deste xeito, asegúrase o deber de rexistro deste tipo de establecementos e facilítase o seu control sanitario.

Ese tipo de establecementos entra a formar parte dun rexistro dentro da Dirección Xeral de Saúde Pública e poderán ser inspeccionados polos concellos e/ou a Consellería de Sanidade, no ámbito das súas competencias.

Este decreto traslada á regulación autonómica o disposto no Real decreto 1021/2022, do 13 de decembro, á vez que facilita a relación das persoas administradas coa propia Administración, a través da actualización dos procedementos de declaración responsable para o inicio da actividade no comercio polo miúdo.

Cómpre remarcar que o Rexistro galego sanitario de empresas e establecementos alimentarios ten como finalidade a protección da saúde pública e dos intereses dos consumidores, facilitando o control oficial das empresas, locais e establecementos sometidos a inscrición.

Os establecementos sometidos a inscrición son aqueles que exercen a súa actividade comercial en Galicia cando esa actividade consista en manipular, preparar, elaborar ou transformar, almacenar ou servir alimentos para a súa venda ou entrega á persoa consumidora final ou a unha colectividade, in situ ou a distancia, con ou sen repartición a domicilio.

Catro capítulos e dezaseis artigos

O decreto componse de catro capítulos e dezaseis artigos. O primeiro capítulo contén disposicións xerais relativas ao seu obxecto. O segundo refírese ao Rexistro galego sanitario de empresas e establecementos sanitarios e ao procedemento de inscrición, modificación e cesamento da actividade. O terceiro aborda as condicións de comercialización e o cuarto recolle o réxime sancionador.

O decreto establece condicións específicas para a subministración de alimentos de produción propia e produtos de orixe animal entre establecementos de comercio polo miúdo, así como as condicións de comercialización de alimentos preparados en locais utilizados como vivenda privada e os requisitos para os almacéns de apoio dos establecementos de venda polo miúdo.

No procedemento de notificación de inicio de actividade establécese o contido mínimo da declaración responsable que, para efectos de inscrición da actividade no rexistro autonómico, debe presentar ante a autoridade competente o operador que elabora alimentos en locais utilizados principalmente como vivenda privada.

Así mesmo, establece un réxime sancionador específico para as infraccións relacionadas coa obriga de comunicación con carácter previo ao comezo das actividades.

O presente decreto entrará en vigor aos vinte días naturais da súa publicación no Diario Oficial de Galicia de hoxe.