O Espazo Xove de Vilalba celebra este venres a 30ª edición do Día da Bicicleta
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- A tradicional marcha ciclista sairá ás 19.30 horas da Praza da Constitución e a xornada contará ademais con sorteos, música en directo e propostas solidarias
Vilalba (Lugo), 25 de agosto de 2025
O Espazo Xove de Vilalba organiza este venres, 29 de agosto, a trixésima edición do Día da Bicicleta, unha cita xa consolidada no calendario de actividades da capital chairega.
A marcha ciclista sairá ás 19.30 horas da Praza da Constitución para facer un percorrido polas rúas da Pravia, rúa de Muras, rúa de Cospeito, avenida Terra Chá, rúa de Galicia, rúa Xosé María Chao Ledo e Praza Suso Gaioso, ata chegar novamente ao punto de inicio.
Os interesados en participar poden inscribirse ata dúas horas antes da saída no Espazo Xove de Vilalba (rúa Novo Cazón, s/n), en horario de 18.00 a 21.00 horas, ou chamando ao teléfono 982 82 83 40. A actividade está aberta a todas as idades e a inscrición é obrigatoria para participar no sorteo de agasallos que se fará unha vez concluído o paseo. A directora xeral de Xuventude, Lara Meneses, sumarase á xornada, na que se prevé repetir o éxito de edicións anteriores con máis dun milleiro de inscritos.
A programación desta nova edición do Día da Bicicleta completarase cun concerto do grupo 'Mario Colomán & The clocks band', que actuará no templete da Praza da Constitución a partir das 21.30 horas.
Como é habitual, o evento terá tamén un marcado carácter solidario. Así, nesta edición recadaranse produtos para o Banco de Alimentos e porase á venda unha camiseta conmemorativa da xornada en homenaxe ao Dj e produtor vilalbés Juan Manuel Filgueiras Rama, máis coñecido como Lelé, gran afeccionado ao ciclismo que faleceu o pasado mes de abril. Os fondos recadados destinaranse integramente á Asociación contra o cancro de Lugo.
O delegado territorial da Xunta en Lugo, Javier Arias, explica que eventos populares como o Día da Bicicleta "contribúen a dar visibilidade ao labor do Espazo Xove, que ofrece á mocidade de Vilalba e da contorna un punto de encontro con alternativas de ocio durante todo o ano".
Entre as últimas propostas que a Administración autonómica ofreceu nestas instalacións figuran a Semana do Deporte -con torneos de baloncesto e fútbol-, a Feira da Primavera, obradoiros gastronómicos ou obradoiros de xadrez e pintura, entre outros.
