A Xunta habilita unha liña de axudas dun millón de euros para facilitar a incorporación ao mercado laboral de novos profesionais do transporte
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- A directora xeral de Mobilidade, Judit Fontela, visitou unha autoescola e o circuíto de prácticas de condución de Narón para informar desta nova orde de axudas que sae publicada hoxe no Diario Oficial de Galicia
- As empresas de formación de condutores que queiran adherirse como entidades colaboradoras disporán dun mes para facelo a partir de mañá
- O obxectivo é contribuír a cubrir os gastos de obtención do certificado de aptitude profesional e dos permisos de condución das clases C e D para mellorar a empregabilidade e paliar a escaseza de condutores para determinados vehículos
- Súmanse ás impulsadas pola Consellería de Cultura, Lingua e Xuventude para a obtención dos A2 e B, para motocicletas e coches, dirixidas á mocidade e que tamén se publicarán este mes
Estas imágenes pertenecen a Página Oficial de la Xunta de Galicia
Narón (A Coruña), 13 de agosto de 2025
A directora xeral de Mobilidade, Judit Fontela, xunto coa delegada territorial da Xunta en Ferrol, Martina Aneiros, visitou unha autoescola e o circuíto de prácticas de condución de Narón para informar das novas axudas impulsadas pola Xunta para facilitar a incorporación ao mercado laboral de novos profesionais do transporte, dotada con un millón de euros.
A orde sae publicada hoxe no Diario Oficial de Galicia e, segundo se recolle nela, subvenciónase tanto a obtención do certificado de aptitude profesional acreditativo da cualificación inicial e na modalidade ampliación ou promoción, como dos permisos de condución das clases C e D.
Judit Fontela explicou que con esta medida se quere dar resposta ás queixas recorrentes do sector do transporte de mercadorías e de viaxeiros por estrada, debido á carencia de persoal que cumpra cos requisitos legais esixidos para o desenvolvemento da condución de determinados vehículos. Trátase tamén de mellorar as posibilidades de empregabilidade dun sector da poboación, ampliando as súas competencias e o seu currículo, como elemento de profesionalización, e promover a súa incorporación ao mercado laboral.
A directora xeral indicou que o prazo de presentación de solicitudes de axuda para as persoas interesadas irá do 1 ao 31 de outubro deste ano, ou cando se esgoten os fondos. A través da medida cubriranse os gastos subvencionables realizados do 30 de outubro de 2024 ao 30 de outubro de 2025. Pola súa banda, as empresas de formación de condutores que queiran adherirse como entidades colaboradoras disporán dun mes para facelo a partir de mañá e constarán como tal na páxina web da Dirección Xeral de Mobilidade e as solicitudes de axudas xestionaranse a través delas.
Liñas de axuda
A orde inclúe dúas liñas de axuda. Unha delas destínase a subvencionar a obtención dos permisos de condución das clases C, C1, C1+E, C+E, D, D1, D1+E. A outra céntrase nos cursos realizados para a obtención do certificado de aptitude profesional acreditativo da cualificación inicial ou de 'ampliación ou promoción', para o exercicio da actividade de condutor profesional de determinados vehículos destinados ao transporte de mercadorías ou de viaxeiros por estrada.
O importe máximo a percibir por persoa será de 1.200 euros, tanto para a obtención do permiso de condución das clases C, C1, C+E, D, D1, D1+E e/ou D+E como para a do certificado de aptitude profesional (CAP). Na modalidade de ampliación ou promoción a contía máxima será de 300 euros. En todo caso, a axuda non pode exceder o total abonado polo alumnado nin superar os 3.900 euros no caso de percibir axudas a través das dúas liñas.
A medida vai dirixida a persoas maiores de 18 anos e empadroadas en Galicia con anterioridade ao 30 de outubro de 2024. Deberán ter abonados os custos dos cursos, da matrícula e das clases de condución. Os cursos para a obtención do certificado de aptitude profesional e dos permisos de conducir das clases C ou D teñen que realizarse en Galicia, a través das empresas autorizadas como centros de formación CAP ou Autoescolas.
Apoio á mocidade
Cómpre lembrar que estas axudas se suman ás impulsadas pola Consellería de Cultura, Lingua e Xuventude para a obtención dos permisos de condución A2 e B para a mocidade galega, cuxa convocatoria se publicará tamén neste mes de agosto. Neste caso, o obxectivo é contribuír á mellora das posibilidades das persoas mozas de ata 30 anos en situación de desemprego, na medida en que se lles facilita un instrumento que amplía as súas competencias e o seu currículo como elemento de profesionalización, ademais de incidir positivamente na súa autonomía persoal.
