A Xunta recibe 14 ofertas para a execución da urbanización para unha área de servizo e sendos aparcadoiros para vehículos e camións na AG-53, en Maside
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- O contrato, licitado por un investimento que supera os 3,6 M€ ten como obxectivo a dotación dunha área de servizo na AG-53, no quilómetro 80+465, con acceso directo en sentido Santiago e conexión mediante un paso a distinto nivel en sentido Ourense
- A funcionalidade desta intervención será tripla, ao incluírse a previsión para unha área de servizo, con subministro de combustible e zona de esparexemento; aparcamento disuasorio tipo carpooling, e aparcamento seguro para camións
- En total, promóvese a conformación dun aparcadoiro con 84 prazas de aparcamento nunha primeira fase, coa previsión de ampliación de ata 132 prazas
Santiago de Compostela, 23 de xullo de 2025
A Xunta recibiu un total de 14 ofertas para a execución da obra de urbanización dun aparcadoiro disuasorio na autoestrada Dozón- Ourense (AG-53), á altura do concello de Maside, que inclúe a previsión para unha área de servizo e aparcamento seguro para camións nesta vía autonómica libre de peaxe.
Este contrato, licitado por investimento de 3,603,103 euros, ten como obxectivo darlle o pulo definitivo á dotación dunha área de servizo na AG-53, no punto quilométrico 80+465, con acceso directo en sentido Santiago de Compostela e conexión mediante un paso a distinto nivel en sentido Ourense.
A funcionalidade desta intervención será tripla, ao incluírse na mesma a área de servizo, con subministro de combustible e zona de esparexemento; aparcamento disuasorio tipo carpooling, e aparcamento seguro para camións.
Obxecto do contrato
O proxecto obxecto de contratación contempla a execución dos accesos á área de servicio, completando os ramais existentes e realizando as novas vías que resulten necesarias, así como o movemento de terras en toda a parcela dispoñible, tanto para os aparcadoiros para vehículos lixeiros e para vehículos pesados así como para a implantación dunha estación de servizo, (cuxo contrato de licitación de concesión realizarase ao longo do ano 2026).
Unha vez executados os accesos e o movemento de terras, procederase á urbanización da parcela e dos propios aparcamentos, nunha superficie de 14.900 m2, e realizarase a restauración ambiental de toda a superficie que forma o dominio público nesta zona, incluída a que non ocuparán directamente as obras.
Ademais, baixo este contrato, promóvese a conformación dun aparcadoiro con 84 prazas de aparcamento nunha primeira fase, e previsión de ampliación ata 132 prazas.
En concreto, o contrato licitado inclúe 54 prazas para vehículos lixeiros, quedando previstas 40 prazas adicionais planificadas e coa explanada xa executada, para un total de 94. En 3 prazas realizarase preinstalación para unha futura recarga do vehículo eléctrico.
Así mesmo, se propón o desenvolvemento de 28 aparcamentos para vehículos pesados, quedando previstas 8 prazas adicionais planificadas e coa explanada xa executada, para un total de 36).
E tamén se inclúen 2 prazas reservadas para persoas con mobilidade reducida.
Na intervención prevista inclúe a Implantación de alumeado público e vídeo vixilancia, tanto nos accesos como nos aparcadoiros, así como o axardinamento de toda a parcela pública non pavimentada, establecendo tanto arboredo como vexetación rastreira. Tamén se realizará o peche exterior de toda a zona de dominio público, así como a adaptación do camiño de servizo actualmente existente na contorna da futura estación de servizo.
