Medio Rural organiza en Arzúa unha xornada sobre a escarda mecánica para reducir o emprego de fitosanitarios no cultivo do millo forraxeiro
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- Esta acción, que terá lugar mañá xoves, está en liña coa Política Agraria Común, que leva anos establecendo unha produción sostible e respectuosa co medio ambiente
- A iniciativa ten como obxectivo mostrar a maquinaria necesaria e analizar os factores que se deben ter en conta para un bo control das herbas non desexables a través do seu emprego
- O estado do terreo, a regulación da maquinaria en función dese estado e a velocidade de traballo son factores clave para un bo control da vexetación
Estas imágenes pertenecen a Página Oficial de la Xunta de Galicia
Santiago de Compostela, 16 de xullo de 2025
A Consellería do Medio Rural organizará mañá xoves en Arzúa unha xornada centrada na demostración de maquinaria específica para reducir ou evitar o emprego de fitosanitarios no cultivo do millo, aínda que pode ser extrapolable a outro tipo de cultivos. Esta acción está en liña coa Política Agraria Común, que leva anos establecendo unha produción sostible e respectuosa co medio ambiente.
No evento analizaranse os factores que se deben ter en conta durante o emprego da maquinaria para un bo control das herbas non desexables. O estado do terreo, a regulación da maquinaria en función dese estado e a velocidade de traballo son factores clave para un bo control da vexetación. Ademais, farase fincapé na importancia de realizar os traballos no momento en que a herba se está implantando.
O programa inclúe unha exposición sobre os ensaios realizados, a presentación dos equipos empregados e tres demostracións en campo coa aixada rotativa arrastrada, a binadora e a gradilla de púas. A actividade pecharase cunha posta en común das impresións das persoas participantes.
A actividade está dirixida a persoas que traballan nos sectores produtivos vinculados coa agricultura, gandaría, industria agroalimentaria ou coa cadea forestal-madeira, así como a quen teña expectativa de incorporarse a estes ámbitos, especialmente mozos e mozas do medio rural galego.
A xornada formativa está promovida polo Departamento de Investigación e Transferencia da Axencia Galega de Calidade Alimentaria, organismo adscrito á Consellería do Medio Rural.
