Rueda reivindica en Ourense o liderado galego no sector aeroespacial co novo edificio da Escola de Enxeñería Aeronáutica
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- O edificio inclúe un financiamento de 6,3 millóns por parte da Xunta, o 60% do total, e contará con 6.500m2 de superficie
- Destaca que a nova Escola forma parte da Iniciativa Estratéxica da Xunta en Aeroespazo, Seguridade e Defensa, que mobilizará máis de 900 millóns de euros ata 2030
- Apunta que o proxecto axuda a consolidar o recoñecemento da Xunta ao Campus de Ourense como campus especializado
Ourense, 11 de xullo de 2025
O presidente da Xunta, Alfonso Rueda, acompañado polo conselleiro de Educación, Ciencia, Universidades e Formación Profesional, Román Rodríguez, participou hoxe no acto de inicio das obras do novo edificio da Escola de Enxeñería Aeronáutica e do Espazo, un proxecto que enmarcou na aposta estratéxica do Goberno galego por facer do sector aeroespacial, da seguridade e da defensa un motor de crecemento, emprego e modernización.
Durante a súa intervención, o xefe do Executivo autonómico salientou que a nova infraestrutura "é necesaria" para axudar a consolidar o recente recoñecemento ao Campus de Ourense e a "darlle futuro á presencia da universidade" na cidade. En cifras, a Xunta financia o 60% do custo total cunha achega de 6,3 millóns de euros e o edificio contará con máis de 6.500m2 dedicados a aulas, laboratorios punteiros e incubadoras de proxectos.
Así, este proxecto reforza a especialización e identidade científica do Campus da Auga, recentemente acreditado como campus especializado pola Xunta, cun financiamento por parte da Administración que supera os 12 millóns de euros desde 2013, e cun enfoque centrado na alimentación, na agricultura, no medio ambiente e no termalismo.
Neste sentido, a nova Escola, única deste tipo no territorio, converterá ao Campus nun referente nacional e europeo en formación especializada neste eido, "atraendo talento de fora" con titulacións pioneiras en Galicia como o Grao en Enxeñería Aeroespacial ou os másteres en Enxeñería Aeronáutica e en Sistemas Aéreos non Tripulados. Rueda tamén tivo palabras para os estudantes, afirmando que "as persoas que estuden aquí teñen un gran futuro por diante".
Nesta liña, o presidente subliñou que esta actuación xera "enormes oportunidades" de cara á Iniciativa Estratéxica da Xunta en Aeroespazo, Seguridade e Defensa, que prevé mobilizar máis de 900 millóns de euros ata 2030, dos cales 183 millóns procederán directamente da Administración autonómica, e que se ve acompañado por un "xiro dos fondos europeos" cara actividades deste tipo.
Rueda tamén celebrou a colaboración coa Universidade e o esforzo institucional, académico e empresarial implicado neste proxecto e sector, no que existen empresas galegas "moi potentes" no mundo.
