A Xunta reitera que a dotación do novo centro de saúde de Moaña se decidirá no momento de poñelo en servizo, contando coa opinión dos profesionais e na procura da mellor asistencia
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- O director xeral de Asistencia Sanitaria do Servizo Galego de Saúde, Alfredo Silva, remarcou que o novo centro de saúde moañés transformará a atención sanitaria da vila ao contar con máis profesionais e servizos
- A Xunta traslada o seu compromiso coa saúde da poboación do Morrazo, tras reformar o centro de saúde de Domaio, ampliar o seu número de profesionais, incorporar unha ambulancia de soporte vital avanzado e ter proxectado a construción dun Centro Integral de Saúde para a comarca en Cangas
- Silva apelou á responsabilidade do Concello de Cangas para que poña á disposición os terreos que permitan avanzar na construción do novo Centro Integral de Saúde do Morrazo
Santiago de Compostela, 10 de xullo de 2025
O director xeral de Asistencia Sanitaria do Servizo Galego de Saúde, Alfredo Silva, reiterou esta mañá no Parlamento de Galicia que a dotación do novo centro de saúde de Moaña se decidirá no momento en que se poña en marcha este servizo, e sempre contando coa opinión dos profesionais e na procura da mellor asistencia posible.
No marco da Comisión 5ª de Sanidade, Política Social e Emprego, o responsable sanitario reivindicou a calidade asistencial que a Xunta presta na comarca do Morrazo, "onde hai planificación, investimento, reforzo asistencial e un compromiso real coa calidade da atención".
Nesta liña, destacou a construción do novo centro de saúde de Moaña, unha infraestrutura cuxo nivel de execución xa acada o 60 % e na que o Goberno galego realiza un investimento de 8,3 millóns de euros.
"O novo centro de saúde suporá unha transformación na atención sanitaria da vila" incidiu Silva, destacando que este inmoble sanitario triplicará a superficie do actual ademais de contar con "máis profesionais e máis servizos".
O responsable de Asistencia Sanitaria destacou tamén que, ademais do novo centro centro de saúde, Moaña tamén veu mellorados e ampliados os seus recursos asistenciais, tras a reforma do centro de saúde de Domaio ou a incorporación dunha ambulancia de soporte vital avanzado en enfermería.
Ademais, lembrou que a convocatoria de prazas de difícil cobertura posta en marcha pola Xunta permitiu dotar con dous novos médicos á localidade.
Referiuse, ademais, ao investimento de 12 millóns de euros para levar a cabo o Plan asistencial do verán, no que se inclúen o reforzo de persoal nos centros sanitarios que o precisen e, especialmente, nas zonas costeiras e de maior afluencia turística, como é o caso da comarca do Morrazo.
Desbloquear a cesión de terreos para o CIS de Cangas
Durante a súa intervención no Pazo do Hórreo, Alfredo Silva insistiu en que a atención sanitaria no conxunto do Morrazo está "prevista, reforzada e garantida". Neste sentido lamentou as mensaxes alarmistas que desde os partidos da oposición se queren trasladar á cidadanía.
Alfredo Silva amosou a súa desconformidade con que desde o Concello de Cangas se siga a obstaculizar a cesión dos terreos necesarios para construír o futuro Centro Integral de Saúde do Morrazo; un CIS, incidiu, que permitiría reorganizar os recursos asistenciais e integrar servizos que agora se atopan dispersos.
"Vostedes falan moito de servizos e recortes, pero son os primeiros que se dedican a bloquear proxectos sanitarios", censurou Silva, salientando que se o Concello de Cangas cumprise, xa estaría en marcha este novo CIS: con urxencias, hospitalización a domicilio e mesmo hemodiálise para toda a comarca.
O director xeral de Asistencia Sanitaria apelou ao sentido da responsabilidade para desbloquear este proxecto, convidando á mediación cos responsables municipais para poder avanzar na construción do novo CIS do Morrazo. "A política útil é aquela que constrúe, non a que repite titulares sen facer autocrítica", concluíu.
