Gómez Caamaño salienta o reforzo estival da asistencia sanitaria no Salnés con ata 17 profesionais e unha ambulancia adicional
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- Explica que a Xunta apuntalará a asistencia sanitaria en concellos como Vilagarcía de Arousa e Cambados durante as súas festividades máis sinaladas
- Remarca que os Puntos de Atención Continuada e os centros de atención primaria do Grove e Sanxenxo ven ampliados o seus cadros de persoal durante o período estival
- O Plan de cobertura asistencial deseñado polo Executivo galego conta cun orzamento de máis de 12 millóns de euros
Santiago de Compostela, 9 de xullo de 2025
O conselleiro de Sanidade, Antonio Gómez Caamaño, detallou esta tarde no Parlamento de Galicia a planificación asistencial que a Xunta elaborou para a comarca do Salnés durante o verán, onde os seus centros de atención primaria se verán reforzados con ata 17 profesionais e unha ambulancia adicional.
Segundo explicou, o Servizo Galego de Saúde reforzará os cadros de persoal nos PAC de Vilagarcía de Arousa e de Cambados nos días nos que se celebrarán as súas festividades máis sinaladas, como é o caso do Atlantic Fest, a Festa da Auga ou a Festa do Albariño.
Gómez Caamaño remarcou que nos concellos onde se produce un maior incremento da poboación por mor do turismo, como é o caso dos concellos do Grove ou o de Sanxenxo, os seus Puntos de Atención Continuada e os centros de saúde tamén se verán reforzados durante o verán con máis persoal médico, de enfermería e de servizos xerais.
Durante a súa intervención, precisou que o incremento de recursos na área do Salnés non se cinguirá soamente á incorporación de máis persoal, senón que tamén levará aparellado outros recursos asistenciais, como o reforzo do transporte sanitario urxente coa incorporación dunha ambulancia adicional.
"Estes reforzos responden a unha planificación rigorosa" subliñou o titular da carteira sanitaria da Xunta, ao tempo que puxo en valor o importante orzamento que o Executivo destinará a garantir a atención sanitaria durante o período estival en toda a comunidade galega.
"O Plan de verán está dotado con máis de 12 millóns de euros para blindar unha cobertura sanitaria axeitada en toda Galicia", incidiu Gómez Caamaño.
O Goberno galego consignou unha partida de 8,8 millóns de euros destinada á contratación de substitucións e reforzos sanitarios nas zonas que se precise, ademais de 3,2 millóns para a posta en marcha diferentes programas de dispoñibilidade de médicos, unha oferta de mobilidade temporal ou unha nova encomenda MIR para que o persoal residente de último ano poida reforzar os centros de saúde no verán.
"Na Consellería de Sanidade anticipámonos, planificamos e actuamos para que a asistencia sanitaria estea garantida en toda Galicia", concluíu o conselleiro.
