Román Rodríguez anima aos 643 mozos que este verán aprenderán idiomas no estranxeiro co apoio da Xunta a sacar o máximo rendemento desta experiencia
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- O titular de Educación lembra que grazas ao programa Galemundo, dotado con 15M€, uns 7.000 estudantes e docentes estanse a formar en linguas en distintos países
- Nas estadías estivais participan alumnos de Bacharelato, que mellorarán as súas competencias lingüísticas en Canadá, Reino Unido, Francia e Alemaña
- A Xunta conta cunha vintena de convocatorias de bolsas para a internacionalización do ensino e a mellora da aprendizaxe de idiomas entre a comunidade escolar
- O vindeiro curso tamén aumenta ata 522 o número de centros plurilingües, nove dos cales implantan este programa por primeira vez
Santiago de Compostela, 28 de xuño de 2025
O conselleiro de Educación, Ciencia, Universidade e FP, Román Rodríguez, participou esta mañá na xornada de benvida para os 643 estudantes de Bacharelato que este verán viaxarán ao estranxeiro co apoio da Xunta co fin de perfeccionar as súas competencias en distintas linguas.
No encontro, no que estivo acompañado pola directora xeral de Ordenación e Innovación Educativa, Judith Fernández, o titular de Educación animou aos mozos a que saquen o máximo rendemento desta experiencia, xa que é "unha oportunidade enriquecedora tanto a nivel formativo como desde a perspectiva persoal" de intercambio con outras culturas e linguas.
Román Rodríguez lembrou tamén que estas estadías forman parte do amplo abano de iniciativas que o Goberno ten en marcha a través do programa Galemundo, dotado con 15M€ para a internacionalización e a mellora da aprendizaxe de idiomas entre a comunidade escolar do que se benefician unhas 7.000 persoas entre estudantes e docentes. "A aprendizaxe de idiomas é hoxe unha esixencia para o futuro profesional de calquera persoa e, por iso, desde a Xunta temos un compromiso indiscutible coma formación académica ao respecto", subliñou o conselleiro, que tamén destacou que Galicia é líder de España en inglés e sitúase no nivel alto do mundo segundo o estudo máis amplo a nivel internacional en coñecemento desta lingua, o Education First (EF).
Estadías en residencias ou con familias
Os 643 estudantes de 1º e 2º curso de Bacharelato que xunto coas súas familias participaron na xornada de hoxe, realizarán estadías de tres semanas en réxime residencial ou familiar en Reino Unido, Francia, Canadá e Alemaña durante os meses de xullo e agosto.
O Goberno galego destina preto de 2M€ a esta actividade, de tal xeito que se subvenciona entre o 92% e o 69% do custo das estancias dos estudantes en Canadá (228 estudantes), Reino Unido (345 estudantes), Francia (60 estudantes) e Alemaña (dez estudantes). Con cargo a esta partida, a Xunta sufraga parte dos gastos de contratación dos monitores que acompañan a cada grupo, mantemento e aloxamento, traslados para actividades, docencia e material escolar, actividades culturais, deportivas e complementarias dos cursos, seguros de accidentes e certificado de realización do curso.
522 centros plurilingües, nove novos
Ademais do Galemundo, composto por unha vintena de liñas de apoio económico, moi diversas e complementarias que favorecen a igualdade de oportunidades respecto á aprendizaxe de linguas estranxeiras, a Xunta tamén reforza o apoio neste eido a través da convocatoria de centros con programas plurilingües, no que o próximo curso participarán un total de 522 centros educativos, dos cales nove implantan programas plurilingües por primeira vez e outros sete que xa formaban parte do programa amplíano a outras etapas educativas. Todos eles, xunto coas Escolas Oficiais de Idiomas, contarán co apoio de 690 auxiliares de conversa de 24 nacionalidades.
Así pois, o vindeiro curso haberá un total de 179 centros plurilingües na Coruña (catro novos e tres que amplían etapa), 69 en Lugo (un deles amplía etapa), 64 en Ourense (dous novos e un que amplía etapa) e 210 na provincia de Pontevedra (tres novos e dous que amplían etapa). O listado dos novos centros plurilingües, ou que amplían etapa é o seguinte:
Provincia da Coruña :
| Nova incorporación | Amplían etapa |
| CEIP Alfonso D. Rodríguez Castelao (Ordes) | CPR Plurilingüe A Ponte Pasaxe (Culleredo) |
| CPI de Xanceda (Mesía) | CPR Plurilingüe Divino Maestro (Santiago de Compostela) |
| CEIP de Portosín (Porto do Son) | IES Plurilingüe Xosé Neira Vilas (Oleiros) |
| CRA de Valdoviño (Valdoviño |
|
Provincia de Lugo:
| Nova incorporación | Amplían etapa |
| - | CEIP Plurilingüe Gregorio Sanz (Ribadeo) |
Provincia de Ourense:
| Nova incorporación | Amplían etapa |
| CEIP Nosa Sra de Xuvencos (Boborás) | CEIP Plurilingüe San Marcos (Cartelle) |
| CEIP Princesa de España (Verín) | - |
Provincia de Pontevedra:
| Nova incorporación | Amplían etapa |
| CEIP A Carballeira (Pontevedra) | CEIP Plurilingüe Outeiro das Penas (Redondela) |
| CEIP de Barrantes (Tomiño) | CPR Plurilingüe Alba (Vigo) |
| EEI Hernán Cortés (Vigo) | - |
