María José Gómez define o sector do viño como un dos piares económicos do rural e "reflexo da Galicia Calidade"
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- A conselleira do Medio Rural participou en Ourense no peche da XIV gala dos premios da Denominación de Orixe Ribeiro
- Salientou que este produto "conforma a identidade de Galicia" e acada un recoñecemento "dentro e fóra das nosas fronteiras"
- Puxo en valor o "esforzo e bo facer" dos axentes deste eido produtivo, que "son quen de elaborar un produto que pon de relevo a máxima que defendemos na Xunta: a calidade agroalimentaria"
Ourense, 26 de xuño de 2025
A conselleira do Medio Rural, María José Gómez, salientou hoxe que o sector do viño, cos seus 10.000 viticultores e 500 adegas, é un dos piares económicos do agro galego e constitúe un "perfecto reflexo desa Galicia Calidade pola que somos coñecidos no mundo enteiro". Valorou ademais que este produto "conforma a identidade de Galicia" e que acada un recoñecemento "dentro e fóra das nosas fronteiras".
Na súa intervención de peche na XIV edición da gala dos premios da Denominación de Orixe (DO) Ribeiro, a conselleira puxo en valor o "esforzo e bo facer" dos axentes deste eido produtivo, que -engadiu- "son quen de elaborar un produto que pon de relevo a máxima que defendemos no Goberno autonómico: a calidade agroalimentaria". Unha calidade que, reafirmou, "é sinónimo tamén de emprego" e lembrou, neste sentido, que o sector vitivinícola supón o 1,4% do PIB de Galicia e xera arredor de 16.000 empregos a tempo completo.
A conselleira, que estivo acompañada neste acto polo director xeral de Gandaría, Agricultura e Industrias Agroalimentarias, José Balseiros; o director da Axencia Galega da Calidade Alimentaria, Martín Alemparte; e o delegado territorial da Xunta en Ourense, Manuel Pardo, subliñou a ampla tradición da DO Ribeiro, a máis antiga da nosa comunidade. Asemade, Gómez sinalou que Galicia pode presumir de ser un dos territorios de España con máis selos de calidade diferenciada, dos cales cinco son denominacións de orixe vitivinícolas, como é o caso do Ribeiro.
Compromiso da Xunta co sector
Para apoiar toda esta riqueza, a titular de Medio Rural incidiu no compromiso da Xunta con este sector. Así, lembrou que só neste ano o seu departamento destina máis de 10 millóns de euros en axudas á reestruturación e reconversión dos viñedos, a impulsar a elaboración e comercialización de produtos vitivinícolas e á promoción do viño galego en mercados internacionais. A maiores, Gómez puxo en valor a Estratexia sectorial, elaborada polo Goberno galego da man do propio sector, para impulsar o inmenso potencial económico, cultural e turístico deste produto, remarcou.
Neste contexto, a conselleira comprometeuse a seguir traballando nesta mesma liña, en colaboración coas denominacións de orixe e indicacións xeográficas protexidas, na promoción, ampliación e diversificación de mercados, diante dun contexto internacional que -dixo- "invítanos, cada día máis, a afianzar esta vía".
A conselleira rematou a súa intervención trasladando os seus parabéns a todos os galardoados nesta gala e agradecendo a súa aposta "polo rural para vivir, por coidar o rural a través do voso traballo e por elixir o rural para establecer e impulsar o voso negocio". Valorou tamén a aportación do sector da hostalería á hora de ofrecer nos seus negocios produtos galegos e achegalos a toda a sociedade. Felicitou, así mesmo, ao Consello Regulador da DO Ribeiro por organizar unha gala "tan fermosa e necesaria coma esta, na que a calidade agroalimentaria é protagonista".
