Martina Aneiros destaca a importancia de eventos como Gadis Surf Festival Ferrol´ para a proxección internacional de Galicia como referente do turismo deportivo
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- A delegada territorial da Xunta en Ferrol participou hoxe, xunto á directora xeral de Promoción da Igualdade, na presentación dunha nova edición do Gadis Surf Festival Ferrol
Ferrol, 24 de xuño de 2025
A delegada da Xunta en Ferrol, Martina Aneiros, xunto coa directora xeral de Promoción da Igualdade, María Quintiana, participou hoxe na presentación dunha nova edición do Gadis Surf Festival Ferrol, o primeiro dos tres eventos da World Surf League (WSL) que se celebrarán este verán en Galicia, onde destacou a relevancia deste campionato para a proxección internacional de Galicia como referente do turismo deportivo, apostando polo deporte como "elemento diferenciador da nosa oferta turística ao tempo que nos mellora como destino".
Concretamente, as praias ferrolás de Esmelle e A Fragata serán o escenario do 25 ao 29 de xuño da Gadis Surf Festival Ferrol. Logo, en agosto terá lugar a Abanca Pantin Classic Galicia Pro, en Valdoviño, e en setembro celebrarase en Razo (Carballo) a Junior Pro Razo. Todas estas probas forman parte da World Surf League, están promovidas polo club de surf Praia de Pantín e contan co apoio da Xunta de Galicia, a través de Turismo de Galicia.
Como novidade deste ano, o campionato dá un salto cualitativo ao incorporar unha proba do circuito mundial Junior WSL JQS 1.000, que se sumará á tradicional competición, tamén internacional, de Longboard LQS 1.000.
A delegada territorial recordou o feito de que estas disciplinas deportivas se teñen convertido "nun produto turístico de categoría, singular e moi representativa do noso territorio ao tempo que serven de escaparate para a promoción das nosas zonas costeiras".
Durante a súa intervención, Aneiros subliñou que eventos coma este son todo un espectáculo deportivo ao aire libre que nos sitúa nun posto relevante en canto a destino sostible, no que se dan cita deportistas de recoñecido prestixio nacional e internacional pero tamén espectadores que gozan da paisaxe e natureza de Ferrol. Ademais do deporte, o público poderá desfrutar durante estes cinco días de música, gastronomía, bautismos de surf e incluso dun campionato de skate.
Nova aposta pola conciliación corresponsable
Por outra banda, a directora xeral de Promoción da Igualdade, María Quintiana, aproveitou para lembrar que grazas á colaboración da Xunta de Galicia, a través dos fondos do Plan Corresponsables, cofinanciados co Ministerio de Igualdade, este certame de surf contará cun Espazo de conciliación, co obxectivo de favorecer a conciliación e a práctica deportiva dirixidas a menores de entre 4 e 16 anos e ás súas familias.
Así, neste recurso de conciliación a rapazada contará con obradoiros didácticos, charlas de reciclaxe, rutas de coñecemento da contorna medioambiental, entre outras actividades, e sempre coa incorporación de aprendizaxes transversais en igualdade e de respecto ao medio ambiente, facendo fincapé na corresponsabilidade e na coeducación dende idades temperás.
Este Espazo de conciliación estará tamén nos outros dous campionatos da World Surf League (WSL) que se celebrarán en Galicia este verán, o Abanca Pantin Classic Galicia Pro e o Junior Pro Razo.
