A Xunta incrementa nun 2,9 % a oferta de prazas de formación sanitaria especializada ata acadar o máximo histórico con 676 prazas para o curso 2025-2026
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- A Consellería de Sanidade convoca 19 prazas máis que o ano anterior e oferta o 100 % das prazas acreditadas para formación nas especialidades máis deficitarias como medicina de familia, pediatría, psiquiatría ou psicoloxía clínica, entre outras
- Para aumentar a súa capacidade de formación de especialistas, Galicia obtivo en 2025 a acreditación de 11 novas prazas en especialidades como oncoloxía médica, enfermería pediátrica, psicoloxía clínica e psiquiatría
- O Goberno galego destina este ano 83,5 M€ ao financiamento da formación de especialistas sanitarios
Santiago de Compostela, 19 de xuño de 2025
O xerente da Axencia Galega de Coñecemento en Saúde, Antonio Fernández Campa, salientou hoxe no Parlamento que Galicia presenta para o curso 2025-2026 a maior oferta de formación sanitaria especializada da súa historia, coa convocatoria de 676 prazas, o que representa un 2,9 % máis que o curso anterior, isto é, 19 prazas máis que na convocatoria anterior.
No marco da Comisión 5ª de Sanidade, Política Social e Emprego do Parlamento de Galicia, o xerente da Axencia Galega de Coñecemento en Saúde explicou o traballo de planificación realizado pola Consellería de Sanidade e a decisión de convocar o 100 % das prazas de formación acreditadas nas especialistas con maior necesidade de profesionais.
Así, nesta convocatoria ofertáronse todas as prazas acreditadas de medicina familiar e comunitaria (207), pediatría (27), matronas (20), medicina interna (20), neuroloxía (9) e, entre outras, de especialidades do ámbito da saúde mental: psiquiatría (19), psiquiatría infantil e da adolescencia (2) e psicoloxía clínica (16).
Fernández Campa subliñou que é o Executivo galego quen financia integramente a formación de especialistas sanitarios e ten consignada unha partida de 83,5 millóns de euros nos orzamentos de 2025.
Para aumentar a súa capacidade formativa, Galicia obtivo este ano a acreditación de 11 novas prazas: 2 de radiofísica hospitalaria (1 no Complexo Hospitalario Universitario de Santiago de Compostela e 1 no Complexo Hospitalario Universitario de Vigo), 1 de enfermería pediátrica (Hospital Universitario Lucus Augusti), 1 de farmacia (Complexo Hospitalario Universitario de Pontevedra), 1 de medicina interna, (CHUS), 1 de inmunoloxía (CHUS), 1 de anatomía patolóxica (CHUP), 1 de oncoloxía médica (Complexo Hospitalario Universitario da Coruña), 1 de dermatoloxía (Chuvi), 1 de psicoloxía clínica (HULA) e 1 de psiquiatría (Complexo Hospitalario Universitario de Ferrol).
Propostas de mellora
O xerente da Axencia Galega de Coñecemento en Saúde celebrou que o Ministerio de Sanidade atendese algunhas das propostas das comunidades autónomas para mellorar o sistema de elección da formación sanitaria especialidade e conseguir que non queden prazas vacantes.
Este curso eliminouse o sistema de elección telemática exclusivo que "obrigaba a seleccionar ata 500 prazas" e tamén se eliminou a nota de corte do exame para que todos os aspirantes teñan posibilidade de escoller praza.
Fernández Campa urxiu ao Ministerio de Sanidade a tomar medidas excepcionais para ofertar prazas da nova especialidade de Medicina de Urxencias e Emerxencias. A creación desta especialidade foi aprobada en 2023 e, polo momento, a formación non poderá comezar ata 2027. Desta forma, "non poderemos contar con eses especialistas ata 2031".
No mesmo sentido manifestou a necesidade de crear a especialidade de Medicina Xenómica, cuxa creación se aprobou en 2024.
Outra das medidas reclamadas ante o Ministerio de Sanidade é incorporar un rexistro de profesionais de todo o Sistema nacional de saúde que permita a planificación das convocatorias de formación de xeito global. O compromiso da súa posta en marcha foi adquirido polo Ministerio en 2018 e segue sen levarse a cabo.
