A Xunta recibe preto de 600 solicitudes para levar a cabo proxectos de desenvolvemento rural no marco da intervención Leader
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- A conselleira María José Gómez visitou esta mañá a Clínica Santo Tomé de Taboada, beneficiaria destas achegas, onde puxo en valor a convocatoria de 2025 dotada con 12,6 millóns de euros, que pechou o prazo de solicitude recentemente
- Ademais, salientou que se presentaron unha trintena de solicitudes para o Bono Activa Rural, unha iniciativa novidosa para a posta en marcha de actividades non agrarias nestas contornas
- A intervención Leader conta cun orzamento de 56,9 millóns de euros ata o ano 2027, dos cales 39,6 millóns son para financiar as operacións a terceiros
Taboada (Lugo), 17 de xuño de 2025
A conselleira do Medio Rural, María José Gómez, visitou hoxe a Clínica Santo Tomé de Taboada, beneficiaria das axudas da intervención Leader, onde puxo en valor os datos acadados pola convocatoria de 2025 das achegas para a execución de operación en apoio a terceiras persoas. Neste sentido, salientou que se recibiron preto de 600 solicitudes para a posta en marcha de diferentes proxectos de desenvolvemento rural no marco desta convocatoria, incluída no Plan Estratéxico da Política Agraria Común (Pepac) e dotada cun orzamento de 12,6 millóns de euros.
Estas achegas son xestionadas polos grupos de desenvolvemento rural (GDR) e con elas financiaranse iniciativas que supoñan a posta en marcha de proxectos produtivos xeradores de emprego e de proxectos non produtivos que beneficien ao conxunto da poboación en xeral.
Como novidade neste período da intervención, esta convocatoria inclúe o Bono Activa Rural. Neste sentido, a conselleira sinalou que se recibiron unha trintena de solicitudes desta subvención, baseada nun importe de axuda a tanto global destinada á creación e posta en marcha de actividades non agrarias nestas contornas, cunha aportación máxima de ata 18.000 euros. Esta axuda non está vinculada á xustificación de ningún gasto ou investimento, senón que se relacionará co mantemento da actividade e co cumprimento do plan empresarial presentado pola persoa seleccionada durante, polo menos, cinco anos.
Case 57 millóns de euros ata 2027
Neste novo período Pepac, a intervención Leader está dotada con 56,9 millóns de euros ata o ano 2027. Deste orzamento, 17,6 millóns foron destinados para sufragar os gastos de funcionamento dos GDR e os 39,6 millóns restantes teñen como fin financiar as operacións a terceiros.
Durante o período anterior, mentres a intervención estivo incluída na medida 19 do Programa de Desenvolvemento Rural (PDR) de Galicia, o programa Leader permitiu aprobar máis de 1.500 proxectos, consolidar máis de 4.000 empregos e crear uns 1.100 novos. Así, mobilizáronse máis de 169 millóns de euros, cunha axuda pública de 77,5 millóns de euros para operacións a terceiros.
Clínica Santo Tomé
A conselleira do Medio Rural destacou que esta liña de axudas contribúe a posta en marcha de proxectos como o da Clínica Santo Tomé, que grazas a esta medida de apoio, contou cunha aportación de preto de 114.000 euros a través do GDR Miño Ulla para a súa instalación e apertura.
Estas instalacións reúnen a profesionais de distintas disciplinas sanitarias co obxectivo de ofertar unha sanidade de calidade na zona de Taboada, empregando a última tecnoloxía no ámbito sanitario.
