A Xunta publica as instrucións para o novo curso, que reforzan a autoridade do profesorado e inciden na convivencia escolar
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- En consonancia con estes obxectivos, apóstase pola neutralidade ideolóxica como base da pluralidade e na promoción do pensamento crítico entre o alumnado
- Tamén se inclúe un tempo de lectura diario en Primaria, de entre 20 e 30 minutos
Santiago de Compostela, 12 de xuño de 2025
A Consellería de Educación, Ciencia, Universidades e FP publica hoxe as instrucións para o novo curso, que reforzan a autoridade do profesorado e inciden na convivencia escolar. Logo de avaliar o documento nos últimos días cos representantes dos centros e das familias, a directora xeral de Ordenación e Innovación Educativa, Judith Fernández, explica ao respecto que os centros "deberán fomentar o respecto, a tolerancia cero contra as agresións e traballar en prol da prevención dos conflitos e da súa solución pacífica".
Como garante do bo clima nas aulas, faise fincapé na condición de autoridade pública do profesorado no exercicio das funcións directivas, organizativas, docentes e de corrección disciplinaria, recoñecida pola Lei de Convivencia de 2011. Ademais, as instrucións insisten na necesidade de que ningún docente sexa vítima de situacións contrarias á convivencia "e, de selo, na importancia de poñelo en coñecemento da administración educativa para prestarlles apoio e asesoramento", destaca a representante da Consellería de Educación.
En consonancia con estes obxectivos, o novo texto aposta pola neutralidade ideolóxica nas actividades complementarias que se desenvolvan nos centros, como base da pluralidade e o respecto ás liberdades individuais en base á Lei orgánica 8/1985 reguladora do dereito á educación. "Deste xeito favorécese a transmisión de valores constitucionais, a promoción do pensamento crítico entre o alumnado e que se informe obxectivamente e de maneira imparcial sobre o pluralismo social", sinala a directora xeral.
As actividades complementarias forman parte da programación e deben estar orientadas a facilitar o desenvolvemento do currículo ou motivar as aprendizaxes. As instrucións establecen que deberán distribuírse dun xeito equilibrado ao longo do curso e estar recollidas na Programación Xeral Anual. Excepcionalmente poden incorporarse actividades sobrevindas coa aprobación do equipo directivo e dando conta ao Consello Escolar e á Inspección Educativa.
Tempo de lectura
As instrucións do curso que vén establecen, así mesmo, un tempo diario para o fomento da lectura en Educación Primaria, de entre 20 e 30 minutos. Tal e como explica a directora xeral de Ordenación e Innovación Educativa, "a medida forma parte do programa de reforzo da lectura incluído no Plan MEGA de mellora educativa de Galicia e ten como obxectivo fomentar o hábito lector, desenvolver as competencias clave e potenciar as estratexia de comprensión de todo tipo de textos e imaxes".
Os centros deberán, ademais, elaborar un Plan de Lectura, Escritura e Acceso á Información e aplicar un tempo dedicado á lectura en todas as etapas cun tratamento transversal, interdisciplinario e de implicación de todo o profesorado e materias, aproveitando as actividades do centro.
As instrucións difúndense hoxe no Portal Educativo e serán publicadas mañá no Diario Oficial de Galicia.
