Román Rodríguez destaca o papel activo dos centros de educación especial para favorecer a inclusión educativa da que Galicia é lider estatal
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- O conselleiro, acompañado pola delegada da Xunta, visita o Centro de Educación Especial CEE Terra de Ferrol, onde avanza medidas pioneiras para blindar un ensino adaptado aos nenos con necesidades específicas e aos intereses das súas familias
- Unha das novidades para o vindeiro curso e a Formación Profesional Adaptada con itinerarios personalizados para colectivos vulnerables
- Na visita, tamén avanza a renovación da cuberta deste colexio, cun orzamento de licitación de 600.000€
Estas imágenes pertenecen a Página Oficial de la Xunta de Galicia
Ferrol, 12 de xuño de 2025
O conselleiro de Educación, Ciencia, Universidades e FP, Román Rodríguez, acompañado pola delegada da Xunta en Ferrol, Martina Aneiros, visitou hoxe o Centro de Educación Especial CEE Terra de Ferrol, onde destacou o "importante papel activo" que exercen este tipo de centros para favorecer a inclusión educativa da que Galicia é líder a nivel estatal. Non en balde, Galicia conta mellor rateo de alumnos/profesor en centros de Educación Especial, con 2,6 fronte á media estatal de 3,4, case un punto máis.
O titular de Educación subliñou que o Goberno galego traballa "desde o espírito de mellora constante" a través da Estratexia de inclusión educativa, Eduinclusión 2030, que entrará en vigor o vindeiro curso, para afianzar aínda máis o recoñecido modelo galego de igualdade e inclusión. Precisamente, un dos piares da estratexia é proporcionar unha educación inclusiva á carta, adaptada aos nenos con necesidades específicas e aos intereses das súas familias, con distintas opcións de escolarización existentes e polas que poden optar con autonomía: en centros ordinarios, modalidade combinada, centros de Educación Especial, etc.
Atención personalizada
Para iso, co fin de mellorar tamén a atención personalizada que reciben estes nenos, a Consellería traballa na revisión dos protocolos actualmente en funcionamento e deseñaranse outros novos en diálogo cos colectivos interesados, así como da normativa existente para adaptala á evolución e necesidades actuais.
Así mesmo, entre as iniciativas novidosas que se porán en marcha xa o vindeiro curso está a creación da FP Básica Adaptada, unha acción pioneira e exclusiva de Galicia enfocada a asegurar a permanencia dos colectivos vulnerables no sistema educativo máis aló das etapas de ensino obrigatorio.
A finalidade desta FP Básica Adaptada, que arrancará como experiencia piloto cun programa formativo en Comercio, é ofrecer "unha formación específica e un apoio personalizado e adaptado ás necesidades de cada un dos alumnos", explicou o conselleiro. Trátase pois, de acompañar e axudar á cualificación destes estudantes para o seu desenvolvemento persoal e profesional aproveitando ao máximo as sinerxías entre a Administración, os centros de Educación Especial e de FP, as entidades e colectivos de atención á diversidade e tamén o tecido empresarial para o impulso de prácticas en empresa.
O conselleiro de Educación reivindicou que a aposta do Goberno galego coa inclusión e a atención á diversidade "é firme" e queda demostrada en medidas xa en marcha como como a contabilidade do alumnado con necesidades educativas especiais por dous ou por tres a efectos de rateos, unha acción pioneira coa que non conta ningunha outra comunidade autónoma en España, ou o incremento constante de profesorado especialista de apoio, que practicamente se duplicou en 15 anos.
Cambio de cuberta
No marco da súa visita ao centro, o conselleiro referiuse tamén á mellora das infraestruturas do CEE Terra de Ferrol, onde xa están licitadas as obras de substitución das cubertas, cun orzamento de case 600.000€. A intervención, que ten un prazo de execución de cinco meses desde a adxudicación, supón a renovación de máis de 4.000 m² de cubertas, incluído as dos módulos do 1 ao 8, taller de carpintería, corredor central e os soportais exterior e de xogo.
A previsión é iniciar a obra a comezos de xullo para tela rematada entre novembro e decembro. Os traballos inclúen a retirada da cubrición actual, a instalación dunha subestrutura de perfís de aceiro e a colocación da nova cuberta de panel sándwich. Tamén se mudan os canos e baixantes por outros novos así como as pranchas metálicas dos soportais por outras combinadas con pezas translúcidas. O proxecto contempla tamén a renovación das luminarias da primeira planta por unhas led con equipos de control lumínico e detector de movemento.
A obra no CEE Terra de Ferrol enmárcase no Plan de nova arquitectura pedagóxica, a folla de ruta coa que o Goberno galego está a modernizar os centros de ensino, converténdoos en instalacións máis eficientes, sostibles e axustadas ás necesidades educativas actuais. Ao seu abeiro, a Xunta inviste 10M€ nunha vintena de actuacións en centros ferroláns entre as que destacan rehabilitacións integrais como as do Colexio CEIP Almirante Juan de Lángara y Huarte (1,4M€) ou do Instituto IES de Catabois (800.000€).
