A Xunta ofrece unha actuación das pandeireteiras do colectivo vigués O Fiadeiro no Museo do Mar de Galicia como novidade do ciclo 'Danza 3'
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- A cita terá lugar mañá nos exteriores do recinto museístico de Vigo para contribuír á homenaxe que as Letras Galegas lle renden á poesía popular oral
- A Consellería de Cultura, Lingua e Xuventude promove ata outubro 21 actuacións de música e baile tradicionais nas catro provincias en colaboración coas agrupacións Xacarandaina, O Fiadeiro e Cantigas e Agarimos
- Participan nesta 13ª edición as localidades de Bande, Boqueixón, Cee, Covelo, Culleredo, A Estrada, Melide, Moaña, Negreira, Ortigueira, Poio, Ramirás, Ribadavia, Rianxo, Vedra, Vigo, Vilalba, Vilanova de Arousa, Vimianzo, Viveiro e Zas
Estas imágenes pertenecen a Página Oficial de la Xunta de Galicia
Vigo, 12 de xuño de 2025
O recinto do Museo do Mar de Galicia, en Vigo, acolle mañá venres ás 19,00 horas a actuación do grupo de pandeIreteiras da formación O Fiadeiro, nunha cita con acceso gratuíto que forma parte de Danza 3, o ciclo promovido pola Xunta de Galicia e o devandito colectivo vigués xunto con Cantigas e Agarimos de Santiago de Compostela e Xacarandaina da Coruña. A iniciativa, que chega este ano á súa décimo terceira edición difundindo a danza e a música tradicionais de Galicia, incorpora concertos de tocadoras de pandeireta en homenaxe á poesía popular oral representada polas cantareiras, ás que en 2025 se lles dedican as Letras Galegas.
A programación de Danza 3, que comezou o pasado 6 de abril co espectáculo de baile de Cantigas e Agarimos en Vedra e continuou o 18 de maio con O Fiadeiro en Boqueixón, desenvolverase ata o mes de outubro visitando un total de 21 concellos das catro provincias con cadansúa cita coa cultura popular galega, a maior parte delas en localizacións exteriores e formatos que facilitan o encontro do público.
Bande, Cee, Covelo, Culleredo, A Estrada, Melide, Moaña, Negreira, Ortigueira, Poio, Ramirás, Ribadavia, Rianxo, Vigo, Vilalba, Vilanova de Arousa, Vimianzo, Viveiro e Zas completan a relación de localidades participantes nesta edición de Danza 3, que se leva a cabo no marco dun convenio de colaboración entre a Axencia Galega das Industrias Culturais e a federación XOC, que aglutina as devanditas agrupacións culturais, e en recoñecemento ao labor de recuperación e difusión patrimonial que realizan coa súa intensa actividade de formación e exhibición neste eido.
Sete actuacións para cada colectivo
Tras a función de mañá en Vigo, Danza 3 continuará en xuño con dúas actuacións o domingo 29 que levarán unha formación musical do Fiadeiro á Ermida de Covelo ás 18,00 h. e o grupo de pandeireteiras de Xacarandaina á Igrexa da Madalena, en Ribadavia, ás 20,00 h.
Xa no mes de xullo, O Fiadeiro actuará en Ramirás (praza de San Andrés de Vilavidal, día 5) e en Bande (complexo arqueolóxico de Aquis Querquennis, día 27); Xacarandaina en Zas (percorrido polas rúas de Baio, día 11) e Viveiro (por concretar localización, día 19) e Cantigas e Agarimos en Negreira (praza do Concello, día 13), Poio (praza da Chousa de Combarro, día 26) e Rianxo (praza Castelao, día 27). O calendario de actividade prolongarase durante todo o verán e rematará o 18 de outubro, coa visita de Xacarandaina a Culleredo.
Cada unha das tres formacións participantes realizará sete actuacións nos distintos concellos, catro delas centradas no repertorio de danza, dúas musicais e unha protagonizada polos grupos de pandeireteiras de cada agrupación.
Por 13º ano consecutivo, a Consellería de Cultura, Lingua e Xuventude, a través da Axencia Galega das Industrias Culturais, renova a súa colaboración coa federación XOC para que a nosa cultura tradicional saia ao encontro da cidadanía e continuar impulsando a proxección social do rico patrimonio inmaterial que atesouran a música e a danza populares de Galicia. Deste xeito, promóvese tamén o labor de investigación, conservación, formación e divulgación arredor do noso folclore que leva a cabo este tipo de agrupacións, en liña, ademais, coa incoación do expediente para a declaración de Ben de Interese Cultural (BIC) da música e o baile tradicionais galegos, iniciado pola Xunta o pasado 25 de novembro de 2024.
