Rueda salienta o compromiso da Xunta coa investigación mariña e a calidade científica no 50º aniversario do CIMA
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- Destaca a influencia do CIMA sobre a modernización da acuicultura galega, a protección dos cultivos de moluscos ou a profesionalización das mariscadoras
- Apunta á aposta da Xunta pola I+D+i propia, con accións como o Plan Galego de Investigación e Innovación 2025-2027, dotado con 1.300 millóns de euros
Vilanova de Arousa (Pontevedra), 11 de xuño de 2025
O presidente da Xunta, Alfonso Rueda, acompañado da conselleira do Mar, Marta Villaverde, participou esta tarde no acto de conmemoración do 50º aniversario do Centro de Investigacións Mariñas de Galicia (CIMA), onde puxo en valor o papel estratéxico que esta institución desempeña no sistema científico galego, así como a aposta do Goberno autonómico por unha investigación útil, conectada co territorio e orientada á mellora da calidade de vida da cidadanía.
Rueda subliñou que o CIMA é un exemplo de excelencia científica con impacto directo sobre o sector do mar, tanto no eido da acuicultura como na xestión sostible dos recursos mariños. Ao longo de medio século de traxectoria, o centro consolidouse como un referente internacional, con máis de 850 comunicacións científicas, 350 publicacións especializadas e preto de 40 teses doutorais. Ademais, conta cun plan de investigación estable ata 2027, cun orzamento próximo aos 3 millóns de euros.
O presidente destacou a evolución do CIMA desde a súa orixe como planta piloto en Vilaxoán ata o seu desenvolvemento actual en Corón e Ribadeo, con 35 profesionais que traballan en áreas clave como a oceanografía costeira, os recursos mariños, a acuicultura ou a patoloxía de moluscos. Un equipo que, segundo indicou, representa o mellor da investigación pública galega, cunha clara vocación de servizo á sociedade e ao sector produtivo.
O xefe do Executivo autonómico enmarcou o labor do CIMA no traballo que tamén se realiza dende a Rede CIGUS, que agrupa dez centros de investigación universitaria de Galicia e simboliza o esforzo conxunto da comunidade científica galega. Nesta liña, destacou que Galicia é líder en crecemento de investimento en I+D+i a nivel estatal, cun incremento do 28% ata alcanzar os 962 millóns de euros e preto de 14.000 persoas dedicadas á actividade investigadora.
Tamén fixo referencia ás principais iniciativas que está a impulsar a Xunta para reforzar o ecosistema científico galego, incluíndo o Plan Galego de Investigación e Innovación 2025-2027, dotado con 1.300 millóns de euros; a creación da Fundación GALTIA para a atracción de talento internacional; ou unha convocatoria histórica de axudas á investigación, con preto de 30 millóns de euros, entre outras accións.
O titular do Goberno galego incidiu na importancia da transferencia do coñecemento como motor de transformación e competitividade, poñendo como exemplo os logros do CIMA: desde a modernización da acuicultura autonómica e a protección dos cultivos de moluscos, ata a mellora da avaliación da saúde dos bancos marisqueiros e o apoio ás confrarías e mariscadoras cara unha maior profesionalización.
Rueda concluíu recoñecendo o papel fundamental que o CIMA desempeña como aliado estratéxico da Xunta na resposta aos desafíos do mar, como o cambio climático, a adaptación á normativa europea e a sustentabilidade dos recursos.
