M. Allegue pon en valor os 68M€, "o maior investimento da historia nun exercicio", para garantir o bo estado do firme das estradas autonómicas, o mesmo día no que a xunta licita o contrato cuatrianual de conservación e vialidade invernal por 184M€
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- A conselleira subliña que estes investimentos en conservación responden á estratexia "estudada e planificada da Xunta e plasmada nos orzamentos" para actuar na rede viaria, "a fin de mantela nas debidas condicións para garantir a seguridade dos usuarios"
- A Xunta publica tamén hoxe a licitación das obras de reforzo de firme na autovía do Barbanza, por case 12M€
- As empresas poderán presentar ofertas para os contratos de conservación ordinaria e vialidade invernal, así como para mellorar o firme da AG-11, ata o 15 de xullo
- A consignación nos orzamentos do 2025 de 68M€ en materia de conservación e seguridade, permitiu xa á Administración autonómica a licitación de obras do plan de reforzos de firmes por 43,6M€, coas que se actuará en 58 estradas, ao seu paso por 75 concellos
Estas imágenes pertenecen a Página Oficial de la Xunta de Galicia
Meaño (Pontevedra), 10 de xuño de 2025
A conselleira de Vivenda e Planificación de Infraestruturas, María Martínez Allegue, destacou hoxe o compromiso e o esforzo inversor da Xunta para garantir o bo estado do firme das estradas autonómicas, no mesmo día en que saen a licitación por preto de 184M€ os contratos para a conservación ordinaria e vialidade invernal para os vindeiros catro anos, ademais das obras de reforzo do firme na autovía do Barbanza, por case 12M€.
A conselleira deu conta destas licitacións na visita que realizou, xunto ao delegado territorial da Xunta en Pontevedra, Agustín Reguera, aos traballos de reforzo do firme na PO-550 ao seu paso por Meaño, no marco dunha actuación en once concellos da provincia pontevedresa que chega aos 3,3M€.
Allegue subliñou que estes investimentos responden á estratexia "estudada e planificada da Xunta e plasmada nos orzamentos" para actuar na rede viaria autonómica, que conta con 5.500 km, "a fin de mantela nas debidas condicións de vialidade, limpeza, sinalización e comodidade e garantir a seguridade dos usuarios".
No marco dese plan, a Xunta licita hoxe, por 184M€, os contratos para as tarefas de conservación ordinaria e vialidade invernal nas estradas autonómicas das catro provincias nos vindeiros catro anos. En concreto, trátase de 8 contratos, que corresponden ás dúas zonas norte e sur no caso das provincias da Coruña, Lugo e Pontevedra, outro para os traballos na provincia de Ourense, que suman 175,3M€, e un contrato adicional para conservación específica de estruturas e obras de paso (8,3M€).
Inclúense operacións de limpeza e roza, pequenas reparacións de firme, mantemento da sinalización horizontal, vertical e o balizamento, pequenas reparacións de obras de fábrica, entre outras. Tamén a vixilancia permanente da rede para atallar calquera incidencia, especialmente nas estradas situadas en zonas propensas a xeadas ou nevadas, co obxecto de mantelas en boas condicións nesa época, coa correspondente dotación de medios persoais (276 persoas) e materiais. (18 medios de transporte e 122 vehículos de maquinaria). As empresas poderán presentar ofertas ata o 15 de xullo.
Reforzos de firme
Neste 2025, os orzamentos da Xunta para conservación viaria acadan os 68M€, "un presuposto sen precedentes no Executivo galego", que supón case un 30% respecto ao ano anterior e que permitiu así mesmo avanzar na licitación de 43,6M en intervencións de reforzos de firmes, que permitirán mellorar o pavimento de 58 estradas autonómicas ao paso por 75 concellos.
Neste eido, inclúese a licitación tamén hoxe por case 12M€ (11,9M€) dos traballos de reforzo de firme na Autovía do Barbanza, AG-11, que discorre por Boiro, Padrón, Dodro, Ribeira, Rianxo e A Pobra do Caramiñal. Actuarase ao longo dos máis de 40km do viario e tamén nos seus enlaces. As empresas poderán presentar ofertas tamén ata o 15 de xullo e prevense iniciar as obras no outono
Actuacións na provincia de Pontevedra
Dos citados 43,6M€ licitados, un total de 3,3M€ destínanse ao proxecto que inclúe, entre outras, a mellora dun treito da PO-550 que hoxe visitou a conselleira en Meaño. Trátase dun proxecto que inclúe a mellora doutros viarios autonómicos ao paso por outros 10 concellos de Pontevedra, O Salnés e a comarca do Umia. (Poio, Cambados, A Illa, Vilanova, Sanxenxo, O Grove, Ribadumia, Cuntis, Moraña e Barro).
Na provincia pontevedresa a Xunta vai investir máis de 4M€ noutros dous proxectos de reforzos de firmes para actuar nos concellos de Bueu, Cangas e Ponte Caldelas (con obras que se iniciarán en xullo), e tamén en viarios ao seu paso por A Guarda, As Neves, Mondariz, Oia, O Rosal, Pazos de Borbén, Ponteareas e Salvaterra, despois do verán.
"Traballamos, polo tanto, para seguir vertebrando o noso territorio con estradas cómodas, sostibles e, polo tanto, seguras. A Xunta se compromete e este compromiso amósao ano tras ano, con feitos, para que galegos e visitantes poidan circular de forma segura na nosa comunidade".
