Belén do Campo pon en valor a aposta de Inleit pola innovación e modernización situándose á vangarda na transformación do sector lácteo galego

Curtis (A Coruña), 9 de xuño de 2025

A delegada da Xunta, Belén do Campo, acompañada polo presidente de Inleit, Alfonso Escobar, e polo alcalde de Curtis, Javier Caínzos, visitou hoxe as instalacións desta empresa dedicada a transformación de leite de vaca para elaborar produtos concentrados a partires das proteínas obtidas por técnicas de filtración. O seu modelo produtivo basease en obter produtos de alto valor engadido cunha gama ampla de aplicacións en diversos mercados, dende a nutrición infantil e suplementos terapeúticos ata a industria láctea ou a nutrición deportiva. Ademais, a fabricación deste tipo de ingredientes funcionais, sitúa a Galicia na vangarda da innovación alimentaria a nivel europeo. Neste senso, Belén do Campo apuntou que Inleit contribúe a impulsar a transformación do leite galego na propia comunidade. "Temos unha materia prima de primeira calidade e o interese do Goberno galego é que estas materias primas poidan transformarse aquí, con todo o valor engadido que isto supón", subliñou delegada.

Inleit conta cunhas instalacións de vangarda de máis de 30.000 metros cadrados, no polígono industrial de Teixeiro en Curtis, onde procesan 250 millóns de litros de leite de vaca procedente de explotacións gandeiras, preferentemente da provincia da Coruña e Lugo, mediante avanzados procesos de filtración, e transformación deste leite en proteínas nativas de alto valor con excepcionais propiedades nutricionais.

Na visita, a representante do Goberno autonómico, salientou a aposta pola innovación e transformación constante desta empresa e lembrou que, o ano pasado, recibiron un apoio da Xunta para a ampliación da súa planta de elaboración de nata, instalando dous novos depósitos de 100.000 litros e unha liña de envasado en bag-in-box. O proxecto nesta planta de nata tamén inclúe a instalación dun sistema de captación de pó na sala de incorporación de mistura e na planta de elaboración de produtos en pó e misturas líquidas, instalando ademais seis transportadores de sacos e mellorando tamén as instalacións de protección contra incendios. Unha intervención que se atopa en execución.

Belén do Campo subliñou que esta empresa contou tamén con apoios do Goberno galego para levar a cabo varios procesos de innovación nos seus produtos lácteos, un para un proxecto de valoración de permeados de lactosa e sales minerais obtidos no proceso de concentración de proteínas de leite, outro para un proceso de valoración da nata e obtención de leite en pó sen lactosa e outros para a ampliación da súa depuradora, incorporando tanques que incrementaron a súa capacidade de almacenamento.

Axudas 2024

A representante do Goberno autonómico lembrou que na convocatoria desta orde do ano 2024, en concorrencia competitiva, aprobáronse en total 62 proxectos, con axudas concedidas por máis de 23 millóns de euros en Galicia, das cales 14 achegas foron para empresas da provincia da Coruña por un importe de case 2,8 millóns de euros a executar entre 2024-2025 e 2026.

Estas axudas, cofinanciadas polo Fondo Europeo Agrícola de Desenvolvemento Rural (Feader), teñen como principal obxectivo promover o desenvolvemento de proxectos industriais do sector agroalimentario, en liña coa finalidade de mellorar a orientación ao mercado e aumentar a competitividade das explotacións agrícolas a curto e longo prazo, en particular cun maior fincapé na investigación, a tecnoloxía e a dixitalización.

Dende 2016, Medio Rural convocou en sete ocasións estas achegas, cun orzamento total adxudicado de 195,04 millóns de euros.