A Xunta salienta a súa aposta pola investigación sanitaria coa iniciativa pioneira de creación dunha categoría profesional específica no Servizo Galego de Saúde
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- A secretaria xeral técnica da Consellería de Sanidade, Natalia Lobato, participou no acto de benvida aos 48 novos investigadores que se incorporaran ao Sistema Galego de Investigación en Saúde
- O Goberno galego está a reforzar o seu ecosistema de investigación sanitaria, mellorando as condicións laborais e a estabilidade do seu persoal investigador
Santiago de Compostela, 5 de xuño de 2025
A secretaria xeral técnica da Consellería de Sanidade, Natalia Lobato Mosquera, salientou hoxe a aposta da Xunta pola investigación sanitaria, demostrada na iniciativa pioneira de creación dunha categoría profesional específica no Servizo Galego de Saúde. Así o dixo no acto de benvida aos 48 novos investigadores que se incorporaran ao Sistema Galego de Investigación en Saúde, celebrado esta mañá no edificio administrativo de San Lázaro.
Acompañada do xerente da Axencia Galega de Coñecemento en Saúde (ACIS), Antonio Fernández-Campa, Lobato puxo en valor o nivel de excelencia co que conta a investigación sanitaria galega e destacou as últimas medidas adoptadas polo Goberno autonómico co obxectivo de dar pulo á rede de coñecemento e innovación galega.
Así, lembrou que Galicia foi pioneira na integración no sector público das súas tres fundacións de investigación sanitaria. Unha medida, abundou, coa que se melloraron as condicións laborais dos máis de 500 profesionais que forman dos seus cadros de persoal.
"Desde a Xunta apostamos decididamente pola Ciencia e a Investigación", incidiu Lobato, amosándose convencida de que os estudos que se están a desenvolver nestes centros "derivarán en avances que terán un impacto positivo na saúde da poboación galega".
O Goberno galego recoñece o papel estratéxico que ten o persoal investigador no ámbito sanitario. Así, durante os últimos anos tamén abordou a homoxeneización das súas categorías profesionais, a implantación de melloras salariais ou a regulación doutras melloras profesionais.
A secretaria xeral técnica da Consellería de Sanidade pechou a súa intervención desexándolle o maior dos éxitos aos novos investigadores, ao tempo que agradeceu ao Instituto de Saúde Carlos III o programa de axudas que promove e que permite atraer e formar aos novos talentos investigadores.
