A Xunta apoia a 194 concellos para a contratación de socorristas durante os meses de verán
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- O Diario Oficial de Galicia publica hoxe resolución da orde de axudas para a prestación do servizo de vixilancia, rescate e salvamento nos espazos acuáticos naturais e en instalacións acuáticas descubertas
- A liña de axudas, dotada con 1,5M€, sufragará os gastos da contratación de persoal de socorrismo durante a tempada estival
Santiago de Compostela, 5 de xuño de 2025
O Diario Oficial de Galicia publica hoxe a resolución da orde de axudas da Consellería de Presidencia, Xustiza e Deportes para financiar a contratación de socorristas por parte dos concellos co obxectivo de garantir a seguridade nas praias, piscinas ou outras instalacións acuáticas durante os meses de verán. A Xunta destina 1,5 millóns de euros a 194 concellos ou mancomunidades beneficiarios, fronte aos 182 do ano pasado.
Trátase de subvencións en réxime de concorrencia competitiva, para a prestación do servizo de vixilancia, rescate e salvamento nos espazos acuáticos naturais ou instalacións acuáticas descubertas de titularidade municipal no período entre o 1 de xuño e o 30 de setembro. Con estas axudas, o Goberno galego busca fomentar a prestación do servizo de socorrismo por parte dos municipios nas épocas de maior concorrencia.
Por provincias, A Coruña e Pontevedra, con maior número de zonas de baño, contan co maior importe de axudas, con 584.000 e 404.000 euros repartidos entre 60 e 38 concellos respectivamente, seguidas de Lugo con case 271.000 euros para 41 e Ourense con 241.000 para 55 concellos.
A contía da subvención concedida a cada entidade local beneficiaria non pode superar o 90% do orzamento do servizo e asignouse de forma proporcional á puntuación acadada como resultado da aplicación dos criterios de valoración establecidos nas bases reguladoras como o número de zonas de baño inscritas no Rexistro de Augas de Baño de Galicia, o número de areais con bandeiras azuis no ano 2024, a poboación do concello, a adhesión ao Plan Sapraga o pasado ano e a declaración de municipio turístico galego.
Así, pese a que a vixilancia de praias e lugares públicos de baño e o seu mantemento compete aos concellos, a Xunta contribúe a fomentar a prestación deste servizo non só con estas axudas para a contratación, senón tamén coa oferta de cursos de formación para incrementar o número de profesionais na nosa comunidade. A maiores, o Goberno galego conta con outras medidas para garantir a seguridade nos municipios máis turísticos como é o caso das subvencións para a contratación de auxiliares de Policía Local.
