Medio Rural apoia a exposición de arredor de 200 viños, licores e augardentes galegos na Feira Vinis Terrae
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- O director da Axencia Galega da Calidade Diferenciada asistiu esta mañá á presentación deste evento que está a ter lugar en Ourense, a única feira do viño profesional con indicativo de calidade
- En total, preto de 50 adegas galegas expoñerán os seus viños a posibles clientes de ata 18 países e os consellos reguladores das cinco DO galegas -Rías Baixas, Ribeiro, Ribeira Sacra, Valdeorras e Monterrei-, disporán dun espazo propio para recibilos
- A presenza nesta feira forma parte das accións de promoción da Consellería do Medio Rural coas que se busca impulsar a comercialización dos produtos vitivinícolas galegos
Estas imágenes pertenecen a Página Oficial de la Xunta de Galicia
Ourense, 2 de xuño de 2025
O director da Axencia Galega da Calidade Alimentaria, Martín Alemparte, acompañado polo delegado territorial da Xunta en Ourense, Manuel Pardo, participou esta mañá na presentación no XI Salón do Viño e Licores de Calidade, a única feira profesional do viño con indicativo de calidade na que se expoñerán en torno a 200 mostras de viños, licores e augardentes galegos co apoio da Consellería do Medio Rural.
O evento, que ten lugar entre hoxe e mañá no recinto feiral de Expourense, ten un marcado carácter profesional no que preto de 50 adegas expoñerán os seus viños a posibles clientes de ata 18 países. Ademais, os consellos reguladores das denominacións de orixe vitivinícolas -Rías Baixas, Ribeiro, Ribeira Sacra, Valdeorras e Monterrei- disporán dun espazo propio no que amosar as súas elaboracións e tamén se contará coa presenza das indicacións xeográficas protexidas vitivinícolas do Val do Miño Ourense e Betanzos.
Neste sentido, o director da Axencia salientou a importancia da celebración de eventos coma este, a través dos cales se poñen en contacto directo a produtores locais da nosa comunidade con clientes potenciais coa promoción dos seus viños. De feito, neste 2025 a Axencia Galega da Calidade Alimentaria xa asistiu a eventos como a Barcelona Wine Week, Fenavin, en Ciudad Real, ou Prowein, en Düsseldorf, afianzando o compromiso da Consellería co impulso da comercialización dos viños galegos.
Ademais, a conselleira do Medio Rural, María José Gómez, participará mañá na clausura da undécima edición deste salón no que se dan cita pequenas e medianas empresas galegas que buscan xerar novas oportunidades no mercado exterior para o sector vitivinícola galego.
