A Xunta reforza a FP con 2.450 prazas máis e a implantación de formacións aceleradas, unha vía rápida de cualificación exclusiva de Galicia

Santiago de Compostela, 2 de xuño de 2025

O presidente da Xunta, Alfonso Rueda, informou hoxe de que o Goberno galego consolidará o vindeiro curso 2025-2026 o continuo crecemento da Formación Profesional experimentado nos últimos anos cunha nova ampliación da oferta de prazas. "Galicia contará con 49.164 prazas para novos matriculados, 2.450 máis que no curso anterior e a oferta más ampla da historia" da comunidade, indicou.

Ademais, resaltou que se seguen dando pasos novidosos desde o punto de vista cualitativo con medidas pioneiras e exclusivas de Galicia como "as novas formacións aceleradas", tal e como se reflicte no informe elevado pola Consellería de Educación, Ciencia, Universidades e FP ao Consello da Xunta celebrado hoxe.

Unhas medidas que enmarcou na "revolución silenciosa" que a FP galega está experimentar nos últimos anos, unhas ensinanzas cun "altísimo grado de inserción laboral, preto do 85% e de case o 100% no caso da FP Dual".

Así pois, Galicia contará o próximo curso cunha oferta de 49.164 prazas de novo ingreso, o que representa 2.450 prazas máis que o curso que agora remata (un 5 % máis) e unha cifra récord no conxunto de 251 ofertas diferentes (40 deles de nova implantación), entre os 159 ciclos (catro novos) de grao básico, medio e superior, 28 másteres (seis novos), 31 títulos de alta especialización (12 novos), 18 formacións aceleradas (todas elas novas) e 15 programas formativos.

Vía rápida de formación concentrada

Como novidade de cara ao vindeiro curso, a Consellería de Educación vai establecer as denominadas formacións aceleradas como unha nova vía formativa que dará máis oportunidades ás persoas para mellorar a súa cualificación e abrirse portas ao mercado laboral en sectores clave nos que existe unha alta demanda especializada.

En concreto, tal e como explicou o presidente, as persoas que opten a esta novidosa modalidade recibirán unha formación concentrada nun período "de entre catro e seis meses de duración", que poderá realizala en dúas fases do curso: de setembro a xaneiro ou de xaneiro a xuño. A través destas formacións recibirán unha certificación profesional e, ademais, poderán convalidala para a obtención dun futuro título formativo.

Ofertaranse un total de 18 formacións aceleradas con 968 prazas en 44 grupos de formación distribuídos por distintos puntos da xeografía galega: A Coruña, Ferrol, Lugo, Ourense, Pontedeume, Pontevedra, Ribadeo, Ribeira, Santiago de Compostela, Vigo, Vilagarcía de Arousa e Vilamarín. Céntrase especialmente en sectores como a hostalaría, a automoción, as enerxías renovables ou a carpintaría metálica, entre outros.

Neste sentido, esta novidade formativa, única e exclusiva de Galicia, representa unha dobre vantaxe, xa que lle proporcionará ás persoas unha formación rápida para o acceso ao mercado laboral e as empresas disporán de man de obra cualificada dun xeito áxil, sobre todo naqueles sectores onde hai máis demanda.

FP Básica Adaptada para os colectivos vulnerables

A través do Plan FPGal360, configurado como un sistema integral de orientación profesional que guíe e acompañe a cidadanía na toma de decisións educativas desde idades temperás e ao longo da vida, este próximo curso vanse poñer en marcha unha serie de iniciativas novidosas no que atinxe á FP Básica, sobre todo enfocadas a maximizar o éxito do alumnado, á inclusión e á cualificación dos colectivos máis vulnerables e a loita contra o abandono temperán.

Unha das novas accións é a FP Básica Adaptada, como unha das vías para asegurar a permanencia do alumnado no sistema máis aló do ensino obrigatorio, especificamente no caso de colectivos con dificultades de escolarización. Para iso crearanse sinerxías entre departamentos ao tempo que se impulsará a colaboración con distintas entidades de educación especial e de atención á diversidade. Trátase de mellorar a cualificación destes alumnos con formación específica, cun apoio personalizado e adaptado ás necesidades de cada quen, co fin de fomentar a súa inclusión social e laboral. Esta FP Básica Adaptada arrancará como experiencia piloto nun programa formativo de Comercio no Centro de Educación e Promoción de Adultos EPAPU Berbés en Vigo.

Paralelamente hai un incremento da oferta de FP Básica, garantindo as posibilidades de incorporación do alumnado a un itinerario formativo en niveis superiores, o que contribuirá á súa mellor formación e á redución do abandono educativo. A terceira liña de acción neste eido é a FP Básica para adultos, con ciclos que favorezan a capacitación profesional e a reinserción de persoas que abandonaron o sistema.

Crecemento no rural

O crecemento da FP galega é xeneralizado a nivel territorial e nos distintos sectores e familias profesionais grazas á potenciación da modalidade de FP Dual Intensiva, aos másteres de FP, aos itinerarios de alta especialización exclusivos de Galicia e ás formacións aceleradas tamén pioneiras.

Así mesmo, continúase cunha aposta firme polo rural galego, que, un curso máis, incrementa a súa oferta adaptada, con 8.210 prazas novas, preto dun 8 % máis. Isto consolida a FP galega como un instrumento que contribúe a fixar poboación grazas á relación de diálogo, confianza e traballo entre a administración educativa e as empresas do rural.

Trátase, por tanto, dunha oferta ampla, variada e de calidade, coa que se busca dar cobertura ao conxunto do territorio, atender as demandas sociais e as necesidades dos sectores produtivos do país. Cómpre ter en conta que, coma todos os anos, esta oferta é o resultado dun traballo de campo tras escoitar os axentes educativos e os distintos actores socio-económicos e institucionais, a través de reunións, encontros e foros.

Catálogo de titulacións

Dentro do catálogo de 251 titulacións, hai dez que se implantan por primeira vez en Galicia, tres delas en ciclos formativos e outras seis de máster:

Másteres e alta especialización

Co obxectivo de ofrecer a máxima cualificación posible, a Xunta continúa apostando polos másteres e as titulacións de alta especialización pioneiras na nosa Comunidade. Estas últimas son títulos formados por dobres titulacións ou combinacións de ciclos, másteres e cursos de distintos títulos impulsados atendendo a unha demanda específica por parte dos sectores produtivos.

No que atinxe aos másteres, Rueda salientou que para o próximo curso "ofértanse un total de 2.192 prazas, o que representa un crecemento do 32 % respecto da oferta deste curso", para cursar 28 titulacións de máster.

No caso das titulacións de alta especialización, o vindeiro curso vanse ofertar un total de 31 títulos de alta especialización (sete máis que o curso pasado), dos cales 12 son de nova implantación este ano. Estas formacións de alta especialización abranguen eidos económico-industriais moi variados como a carpintaría e o moble, construcións metálicas, automoción, cociña, produción agroecolóxica, informática, xestión turística, obra civil ou loxística, entre outros. En total, "ofértanse 775 prazas, o que representa un aumento de máis do 24 %".

A modalidade de FP Dual Intensiva, que afonda nunha maior formación en empresa, contará con 6.346 prazas, cun aumento de preto do 3 %.

Por outra parte, tamén se mantén a oferta de programas formativos básicos, un instrumento de especial relevancia para que o alumnado con necesidades educativas especiais poida conseguir a súa incorporación ao mercado laboral ou a súa continuidade no sistema educativo.