A Xunta pon en valor o compromiso das axencias de viaxes cun turismo sostible que garanta a protección dos valores do Parque Nacional das Illas Atlánticas
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- Ángeles Vázquez subliña que a Carta Europea de Turismo Sostible supón un recoñecemento á aposta por un turismo responsable e de calidade xa que avalan o cumprimento duns estándares de sostibilidade e respecto ao medio ambiente
- O Parque Nacional das Illas Atlánticas é o que máis axencias de viaxes acreditadas ten neste momento e véñense sumar aos certificados que teñen xa 26 empresas que operan neste espazo
- A adhesión á carta europea supón unha vantaxe competitiva para as empresas, beneficiarse de novas oportunidades comerciais, reforzar a calidade da súa oferta turística ou racionalizar os gastos
Vigo, 31 de maio de 2025
A conselleira de Medio Ambiente e Cambio Climático, Ángeles Vázquez, puxo hoxe en valor o compromiso das axencias de viaxes co desenvolvemento dun turismo sostible que garanta a protección dos valores naturais, culturais e sociais do Parque Nacional marítimo-terrestre das Illas Atlánticas de Galicia.
Durante o acto de entrega dos certificados de adhesión á Carta Europea de Turismo Sostible a seis axencias de viaxes que operan neste espazo natural protexido, a conselleira subliñou que estas acreditacións supoñen un recoñecemento á aposta por un turismo responsable e de calidade, xa que avalan o cumprimento duns estándares de sostibilidade e respecto ao medio ambiente. "Somos referentes do ecoturismo en España cunha oferta de experiencias únicas e responsables", engadiu Ángeles Vázquez.
Nesa liña, a conselleira indicou que o Parque Nacional das Illas Atlánticas é o que máis axencias acreditadas ten neste momento e véñense sumar ás 26 empresas -de turismo náutico, cámpings, actividades de aventura, mergullo ou rutas guiadas- que xa teñen estes certificados, que as converten en embaixadoras do turismo sostible xa que cumpren o criterio de satisfacer as necesidades de visitantes, empresas e poboacións locais sen danar o medio ambiente.
Segundo dixo a conselleira, que estivo acompañada da delegada territorial da Xunta en Vigo, Ana Ortiz, entre todos -Xunta, empresas e axencias de viaxes- "contribuímos a acadar o obxectivo de que o Parque Nacional sexa un destino de natureza de referencia".
Nese senso, cómpre lembrar que as entidades certificadas coa Carta Europea de Turismo Sostible deberon superar un proceso formativo, que incluíu unha diagnose da súa actividade, a implantación dunha serie de medidas para mellorar o seu traballo e conectalo co espazo protexido no que se desenvolve, visitas aos establecementos e mesmo unha auditoría ambiental.
Ademais, nesa fase de preparación, de seis meses de duración, as empresas reciben asistencia técnica da Federación Europarc-España -que é quen outorga o recoñecemento- e do propio Parque Nacional marítimo-terrestre das Illas Atlánticas. Ás entidades entrégaselles un diploma acreditativo e unha placa de identificación para que poidan exhibir nos seus locais ou embarcacións, e comprométense a realizar unha serie de melloras e actividades nos tres anos seguintes a recibir a certificación.
A adhesión á carta europea supón unha vantaxe competitiva para as empresas e permítelles ser recoñecidas a nivel europeo, beneficiarse de novas oportunidades comerciais -como o acceso a novos clientes atraídos polos espazos protexidos ou polo descubrimento do medio ambiente, entre outras-, reforzar a calidade da súa oferta turística ou racionalizar os gastos.
