A Xunta salienta a contribución de empresas como Birdmind a que Galicia avance na consecución dos obxectivos climáticos e da economía circular
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- Ángeles Vázquez destaca que os principios desta iniciativa empresarial coinciden cos do Executivo galego, tanto nas medidas fronte ao quecemento global como no aproveitamento íntegro dos recursos dispoñibles, buscando o desperdicio cero
- A conselleira agradece aos responsables da firma a súa adhesión á Alianza Galega polo Clima, que xa conta con máis de 200 socios entre distintas entidades
- O Executivo autonómico lembra que o compromiso co medio ambiente do tecido produtivo foi clave para que a Comunidade sexa líder na redución das emisións de efecto invernadoiro e vaino ser tamén para acadar a neutralidade climática en 2040
Estas imágenes pertenecen a Página Oficial de la Xunta de Galicia
Pontevedra, 27 de maio de 2025
A conselleira de Medio Ambiente e Cambio Climático, Ángeles Vázquez, visitou hoxe as instalacións da empresa Birdmind en Pontevedra e salientou a importancia de firmas coma esta para Galicia pois contribúen á consecución dos obxectivos climáticos e a avanzar nun modelo de economía circular.
A responsable autonómica destacou que se trata dunha iniciativa empresarial que aposta continuamente pola investigación e a innovación co obxectivo de ser plenamente circular mediante a fabricación de materiais para a construción e o deseño de interiores a partir de desperdicios agrícolas. Ademais, faino sen consumir auga e recorrendo a enerxías de orixe 100% renovable.
Por iso, incidiu a conselleira, é unha empresa cun xeito de traballar que coincide totalmente cos principios que defende a Consellería de Medio Ambiente e Cambio Climático tanto para facer fronte ao quecemento global como para o aproveitamento íntegro dos recursos dispoñibles, buscando o desperdicio cero.
Nesta liña, agradeceu aos responsables de Birdmind que decidisen adherirse á Alianza Galega polo Clima -asinaron hoxe o protocolo de incorporación-, pois serán todo un exemplo e referente para outras compañías tanto na mellora dos seus procesos produtivos para respectar o medio ambiente como á hora de incorporarse a esta iniciativa de loita contra o cambio climático que xa conta con máis de 200 socios entre empresas, universidades, autoridades portuarias e outras entidades.
Ángeles Vázquez, que estivo acompañada polo delegado territorial da Xunta en Pontevedra, Agustín Reguera, e pola directora xeral de Enerxías Renovables e Cambio Climático, Paula Uría, puxo en valor que o compromiso co medio ambiente do tecido produtivo vai axudar a que Galicia acade o seu ambicioso obxectivo de ser climaticamente neutra no ano 2040, unha década antes da meta fixada a nivel europeo.
Balance emisións
Nesta liña, a conselleira engadiu que o compromiso do tecido empresarial galego neste eido foi tamén o que permitiu que sexa a comunidade autónoma líder na redución das emisións de efecto invernadoiro respecto a 1990, cun descenso de preto do 62% e moi por enriba da rebaixa do conxunto de España, do 12,6%.
De feito, e co fin de avanzar neste eido, a Xunta está a pedir ao Goberno central que as autonomías poidan participar e xestionar activamente fondos do Plan Social para o Clima, que contará cun orzamento de 9.000 millóns de euros para o período 2026-2032 dos que o 75% será aportado por Europa e o 25% restante serán achegas estatais. En total, os recursos que se prevé mobilizar a nivel europeo a través do Fondo Social para o Clima roldan os 90.000 millóns de euros.
A empresa
Birdmind é un proxecto posto en marcha recentemente polo emprendedor David Camba, 100% circular e sostible, unha empresa pioneira na fabricación de materiais innovadores para a construción e o deseño de interiores a partir de desperdicios agrícolas. Nesta liña, deseña produtos que preservan os recursos naturais baixo distintos principios como Deforestación Cero, Libre de formaldehído ou Pegada hídrica cero.
O seu produto estrela agora mesmo é o taboleiro RiceTab, fabricado a partir de cascarilla de arroz -un subproduto agrícola- que evita recorrer a madeira virxe para a súa produción ao tempo que posúe propiedades ignífugas, hidrófugas e antifúnxicas. Ademais, ao final da vida útil dos produtos elaborados con este material, Birdmind ofrece un servizo de reciclaxe polo que o taboleiro se volve a triturar e se reincorpora ao ciclo de produción, pechando o círculo dunha cadea de subministración sen desperdicio.
