A Xunta avoga por ampliar a formación no sector forestal en ámbitos como o das certificacións da biomasa
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- O director da Axencia Galega da Industria Forestal (Xera), Alfredo Fernández Ríos, inaugurou hoxe no CIS Madeira o Curso de certificación de leña e acha, organizado polo Clúster da Biomasa de Galicia e a Asociación BIOECO2
- A actividade enmárcase dentro dos apoios da Xunta para a organización de cursos formativos non regrados no sector, dos que o pasado ano se beneficiaron máis de 1.000 profesionais
- Destaca a importancia de que os fabricantes impulsen a fabricación de leña e estela certificada a través da implantación de sistemas de control nas súas fábricas
San Cibrao das Viñas (Ourense), 20 de maio de 2025
O director da Axencia Galega da Industria Forestal (Xera), Alfredo Fernández Ríos, salientou hoxe a aposta que está facendo a Xunta de Galicia por ampliar os coñecementos e habilidades dos profesionais que traballan na industria forestal, especialmente, en ámbitos como o da certificación da biomasa.
Fernández Ríos participou hoxe na inauguración do Curso de certificación de leña e acha, organizado polo Clúster da Biomasa de Galicia e a Asociación BIOECO2 no CIS Madeira, que ten como obxectivo fomentar a profesionalización neste ámbito. A actividade enmárcase dentro dos apoios que ten a Axencia Galega da Industria Forestal (Xera) para a organización de cursos formativos non regrados que impulsen o coñecemento e a competitividade da industria forestal-madeira de Galicia.
Este curso de formación tratará os procedementos lexislativos, normativos e técnicos vinculados á certificación da leña e de estelas co obxectivo de que os participantes coñezan as obrigas legais, os mecanismos de control e as certificación dispoñibles, fundamentais para garantir a calidade da materia prima no sector da biomasa.
O director da Xera destacou a importancia de que os fabricantes impulsen a fabricación de leña e estela certificada a través da implantación de sistemas de control nas súas fábricas. "A existencia de combustibles normalizados e certificados no mercado permite aumentar a eficiencia da combustión, diminuír as emisións e dar maiores garantías legais a consumidores e produtores, polo que é fundamental para un desenvolvemento futuro do sector", dixo.
Segundo lembrou, nos últimos anos elevouse a demanda de leñas e estelas polos altos prezos dos combustibles fósiles e da electricidade. Ademais, o seu aproveitamento é unha forma de darlle valor á madeira que, polas súas características, non ten outros usos industriais. Neste sentido, destacou o compromiso da Xunta de Galicia co emprego da biomasa, especialmente, en edificios públicos como o complexo administrativo de San Caetano e en hospitais e centros educativos públicos.
Fernández Ríos apuntou que a última convocatoria da liña de axudas da Xera para formación non regrada no sector publicouse no ano 2024 cun orzamento total de 800.000 euros, para o ano 2024 e 2025, e beneficiou a máis de 1.000 traballadores da industria forestal-madeira.
