A Xunta investirá máis de 1,6 M€ para garantir o servizo de depuración de augas á veciñanza de Ponte Caldelas, Soutomaior, Vilaboa e Pontevedra
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- Entre as tarefas a desenvolver no período 2025-2029 inclúense os traballos de explotación necesarios para asegurar o seu correcto funcionamento e os labores de mantemento e conservación das instalacións, equipos e demais elementos das EDAR
- O contrato enmárcase na liña de colaboración técnica e económica que mantén o Goberno galego coas entidades locais para ofrecer unha alternativa de xestión autonómica destes servizos, profesionalizando a xestión e garantindo a súa calidade
Estas imágenes pertenecen a Página Oficial de la Xunta de Galicia
Santiago de Compostela, 18 de maio de 2025
A Xunta, a través do organismo hidráulico Augas de Galicia, destinará máis de 1,6 millóns de euros a garantir o correcto funcionamento do servizo de depuración de augas residuais nos concellos de Ponte Caldelas, Soutomaior, Vilaboa e Pontevedra durante os próximos 5 anos —2025-2029—.
Nese senso, a Consellería de Medio Ambiente e Cambio Climático acaba de adxudicar o servizo para a explotación, mantemento e conservación das estacións depuradoras de augas residuais (EDAR) de Ponte Caldelas, Comboa (Soutomaior) e Riomaior (Vilaboa), infraestruturas que, ademais dos tres municipios nos que se localizan, tamén proporcionan este servizo a unha parte da cidade pontevedresa. En total, estímase que máis de 8.500 persoas se beneficiarán deste contrato.
As tarefas a desenvolver comprenden, entre outras cuestións, os traballos de explotación necesarios para que os elementos do sistema público de saneamento e depuración de augas obxecto do contrato poidan cumprir co seu cometido.
Ademais, para que operen en condicións óptimas de funcionamento, a adxudicataria tamén debe garantir o mantemento e a conservación en perfecto estado das instalacións así como dos equipos e demais elementos existentes nas tres EDAR.
A prestación do servizo estenderase durante dous anos prorrogables por outros tres de forma que a adxudicataria terá que facerse cargo do servizo de explotación, mantemento e conservación das tres depuradoras ata 2029.
Aínda que a prestación dos servizos de saneamento e abastecemento son unha responsabilidade de competencia municipal, a Xunta leva anos prestando o seu apoio técnico e financeiro aos concellos que o necesiten no marco dunha estratexia coa que busca ofrecer unha alternativa de xestión autonómica dos servizos da auga.
De feito, actualmente Augas de Galicia encárgase da explotación dun total de 28 estacións depuradoras de augas residuais no conxunto da comunidade.
Esta liña de colaboración viuse reforzada coa Lei de mellora da xestión do ciclo integral da auga, aprobada no ano 2022 e que desenvolve ferramentas de apoio aos municipios en materia de depuración e saneamento ante as dificultades técnicas e financeiras que teñen algúns deles para asumilo, facilitando que este servizo se poida prestar directamente pola Xunta mediante un sistema de adhesión voluntario.
Ademais, o actual modelo de prestación de servizos autonómicos contribúe tamén a profesionalizar a xestión da auga, a garantir o bo estado ecolóxico dos ríos e rías de Galicia e a mellorar a calidade duns servizos básicos para a cidadanía.
