A Xunta salienta a importancia de apostar pola investigación para avanzar na reutilización de residuos e consolidar un modelo de economía circular
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- Ángeles Vázquez pon en valor o papel das empresas concienciadas co uso eficiente dos recursos e a valorización dos subprodutos e refugallos
- A conselleira lembra que este xeito de actuar permite transformar lixo en materias primas de alto valor engadido creando oportunidades de negocio onde antes había un problema, o que contribúe a que Galicia sexa un referente no coidado da contorna
- O Executivo galego apoia tanto ás entidades públicas como privadas na implantación de melloras para a xestión dos residuos e asesóraas co fin último de concienciar ao conxunto da cidadanía sobre a importancia das prácticas respectuosas neste eido
O Porriño (Pontevedra), 16 de maio de 2025
A Xunta destaca a importancia de intensificar os esforzos na aposta pola investigación co fin de avanzar na reutilización dos distintos residuos que se xeran -tanto nos fogares como nas industrias- e consolidar un modelo de economía circular responsable e respectuoso co medio ambiente.
Así o destacou hoxe a conselleira de Medio Ambiente e Cambio Climático, Ángeles Vázquez, durante a súa visita ás instalacións que o centro tecnolóxico AIMEN ten no Porriño, onde puxo en valor o labor que realizan este tipo de entidades no ámbito da sustentabilidade e a innovación tecnolóxica. Neste senso, salientou que este centro é un bo exemplo de empresa innovadora vinculada coa economía circular, o uso eficiente dos recursos e a valorización de subprodutos e residuos.
De feito, incidiu a responsable autonómica, ten capacidade para transformar residuos en materias primas de alto valor engadido creando oportunidades de negocio sostible onde antes había un problema, o que encaixa coa pretensión da Xunta -apoiando aos concellos e ás empresas- de que Galicia sexa un referente no coidado da contorna e na aposta pola economía circular a todos os niveis.
Ángeles Vázquez lembrou que este centro tecnolóxico tamén ten en marcha proxectos relacionados coa xestión e a calidade da auga, unha cuestión vital para a comunidade dado que se trata dun recurso fundamental para o conxunto da cidadanía, para o tecido produtivo e para a conservación dos espazos naturais da comunidade.
Precisamente, a Xunta está a apoiar ás empresas e concellos na aposta por ese modelo de economía circular, para o que convocou distintas axudas co fin de avanzar na xestión dos distintos residuos e tamén está a colaborar e a asesorar ás entidades públicas e privadas para que adopten medidas coas que optimizar tanto a xestión como o tratamento do lixo e a sensibilización do conxunto da cidadanía nas prácticas respectuosas neste eido.
A entidade
AIMEN é un centro tecnolóxico e de innovación creado en 1967 altamente especializado no campo dos materiais e as tecnoloxías de fabricación avanzada. Entre as súas especialidades están os traballos de unión e soldadura, tecnoloxías láser aplicadas ao procesamento de materiais, a robótica e a automatización.
Esta entidade factura preto de 22 millóns de euros anuais e conta con máis de 300 traballadores entre as súas oficinas centrais do Porriño e outras repartidas por España, que prestan servizos a nivel internacional. De feito, nos últimos 10 anos participou en 282 proxectos de I+D+i, o que a converte nunha entidade referente na investigación e desenvolvemento de solucións innovadoras que favorecen a sustentabilidade e a optimización dos recursos industriais.
