A Xunta pon en marcha un programa para facilitar ás entidades locais a posta a disposición de solo para a construción de vivenda protexida
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- O Goberno galego abre o prazo para que as administracións locais teñan a capacidade de sacar a concurso as parcelas da súa titularidade, para construír vivendas de protección autonómica, coa axuda do IGVS, a través desta nova ferramenta
- Esta iniciativa da Xunta trata de axilizar a construción de vivenda protexida en solos de titularidade municipal, tanto en réxime de venda como en alugueiro
- Allegue recordou que o prazo para solicitar as axudas a promotores e cooperativas xa está aberto
Estas imágenes pertenecen a Página Oficial de la Xunta de Galicia
Santiago de Compostela, 9 de maio de 2025
A conselleira de Vivenda e Planificación de Infraestruturas, María M. Allegue, xunto co secretario xeral de Vivenda e Urbanismo, Heriberto García Porto, deu conta da publicación no Diario Oficial de Galicia da nova ferramenta que a Xunta pon a disposición dos concellos e deputacións para facilitar que poidan ofertar, mediante concurso público, as parcelas da súa titularidade para a construción de vivendas protexidas na comunidade.
Esta nova iniciativa da Xunta que se ofrece das entidades locais que desexen adherirse, xestionarase a través da firma dun convenio co Instituto Galego de Vivenda e Solo (IGVS), que dará soporte aos concellos en todo o proceso. O obxectivo é mellorar a capacidade das administracións locais para fomentar a construción de vivendas de protección autonómica (VPA), tanto en réxime de alugueiro como de venda.
A adxudicación das parcelas que se incorporen ao programa realizarase mediante un concurso público en réxime de libre concorrencia, que será tramitado polo IGVS en colaboración coa entidade local titular da parcela.
O IGVS tamén se encargará da publicación do solo dispoñible, a redacción dos pregos de bases, os anuncios de licitación, a mesa de contratación e a valoración técnica das ofertas, de maneira que os concellos unicamente terán que remitir ao IGVS a información sobre as parcelas a adxudicar e ditar a resolución de adxudicación, ademais de participar na mesa de contratación.
O prazo para solicitar a sinatura do convenio de colaboración co IGVS permanecerá aberto indefinidamente.
Aberto o prazo para as axudas a promotores
Por outra banda, Allegue lembrou que onte se abriu o prazo para a terceira convocatoria da liña de axudas para promotores públicos e privados e cooperativas para construír inmobles que contribúan a reforzar o parque público residencial a prezo accesible, tanto para alugueiro, como para a compravenda. Esta última modalidade é unha novidade, e se financia cun orzamento de 4,9M€ de fondos propios da Xunta.
O prazo de presentación de solicitudes rematará o 30 de setembro e o investimento total ascende a 9,5M€.
