Gómez Caamaño avanza a licitación este ano do aparcadoiro que elevará a preto de 1.300 as prazas do Hospital Montecelo, case 400 delas gratuítas e as demais con tarifas asequibles

Santiago de Compostela, 7 de maio de 2025

O conselleiro de Sanidade, Antonio Gómez Caamaño, avanzou hoxe no Parlamento de Galicia a licitación, este ano, do aparcadoiro que elevará a preto de 1.300 as prazas do Hospital Montecelo de Pontevedra, das que case 400 delas serán gratuítas e as demais terán tarifas asequibles.

O conselleiro detallou que antes do verán o seu departamento elevará ao Consello da Xunta a ocupación dos terreos, a aprobación do anteproxecto e a estrutura de custos do aparcadoiro, como paso previo á súa licitación neste 2025.

A construción do Novo Montecelo leva aparellada a dotación de 128 prazas de aparcamento gratuíto na zona de urxencias, que se sumarán ás 261 xa existentes. 

Paralelamente, o conselleiro subliñou que a Xunta traballa no impulso dese novo aparcadoiro de case 900 prazas con prezos asequibles, que elevará a case 1.300 os espazos de estacionamento seguro e ordenado á disposición dos usuarios e traballadores do hospital.

A primeira media hora do novo aparcadoiro será gratuíta e haberá bonos para traballadores e usuarios frecuentes. A Xunta vai achegar 3,5 millóns de euros á construción do aparcadoiro e 440.000 euros anuais para garantir a viabilidade da concesión e tarifas asequibles para os cidadáns. 

Hospital de referencia

Tal e como remarcou o conselleiro, o Novo Montecelo permitirá incrementar en 120 o número de camas e ofrecer o 60 % de habituacións individuais. Ademais, aumentará nun 92 % os postos de urxencia e en preto dun 50 % as prazas de hospital de día. Así mesmo, crearanse tres novos quirófanos, unha nova UCI pediátrica e 53 consultas máis.

Este novo hospital de rede sanitaria pública galega, que conta dun investimento de 200 millóns de euros entre obra e equipamento, suporá que os pacientes de cancro poidan recibir tratamentos de radioterapia en Pontevedra, en lugar de ter que desprazarse a Vigo, como ata agora.

Segundo indicou o conselleiro, será un hospital de referencia en Galicia que se porá ao servizo dunha poboación de 300.000 habitantes de 26 concellos co fin de ofrecerlles unha atención máis humana, con instalacións máis amplas e dotadas con tecnoloxía de última xeración.

Actualmente as obras do hospital atópanse na fase final da súa execución, próxima ao 90 %. De xeito paralelo estase a avanzar na contratación do equipamento. A previsión é comezar a atender pacientes a finais deste ano ou a comezos do seguinte.

Gómez Caamaño incidiu en que a Xunta está a poñer todo da súa man para garantir unha asistencia sanitaria de calidade e uns bos servizos públicos á cidadanía de Pontevedra.

Sinalou, en todo caso, que facilitar o acceso da cidadanía aos servizos sanitarios é un obxectivo ao que todas as administracións poden contribuír, como de feito fan moitos concellos, que ceden terreos para os centros de saúde, habilitan sistemas de transporte público ou facilitan prazas de aparcadoiro para os seus veciños. 

Neste sentido lembrou que o Concello de Pontevedra asinou no seu día un convenio de colaboración coa Xunta para facilitar a construción do Hospital Público Novo Montecelo. Tamén que grazas á implicación da Deputación Provincial de Pontevedra, o pasado ano entrou en servizo un novo acceso ao hospital, logo dun investimento de algo máis de 1 millón de euros. 

Resaltou, neste sentido, que a implicación doutras administracións contribúe a obter un maior rendemento social do grande esforzo que realiza a Xunta por mellorar cada día a sanidade galega.