A Xunta acada a maior cifra da historia na campaña de verán con 11.630 prazas

Santiago de Compostela, 28 de abril de 2025

O presidente da Xunta, Alfonso Rueda, anunciou hoxe que Galicia vai contar este ano "coa maior oferta de prazas" de campamentos e actividades de verán da súa historia. "Serán 11.650 prazas para a mocidade entre 9 e 30 anos, unha cifra récord", o que supón 100 máis que na campaña anterior.

A campaña de verán trátase  dun programa xa consolidado a través do cal a Consellería de Cultura, Lingua e Xuventude fomenta que os máis novos empreguen o seu tempo libre durante os meses de xullo, agosto e setembro participando en actividades de carácter "lúdico, cultural, deportivo" e formativo, e que supón, ademais, un recurso "que facilita a conciliación familiar". Neste senso, Galicia segue a ser un referente a nivel de todo o Estado, dado que ofrece unha programación que a converte en destino preferente para os mozos e mozas galegos, doutras comunidades autónomas e do estranxeiro, aos cales se lles facilita un recurso de lecer educativo de primeiro nivel.

Cómpre destacar tamén que esta campaña, que cada ano pon en marcha o Goberno galego, avoga plenamente pola integración e a inclusión, de maneira que todos os mozos e mozas teñen a oportunidade de participar en igualdade de condicións e con independencia das súas necesidades específicas, xa que contan sempre co persoal especializado que se precise. Deste xeito, as persoas con discapacidade poden presentar a súa solicitude de participación en campamentos a través da convocatoria da Consellería de Cultura, Lingua e Xuventude ou optar pola convocatoria específica da Consellería de Política Social e Igualdade.

O prazo de inscricións abrirá este venres, despois da publicación o mércores da convocatoria no Diario Oficial de Galicia, agás para o programa de actividades de lecer alternativo para maiores de 18 anos, que abrirá en maio. Como novidade, este ano simplifícase a petición de prazas ao pasar de 4 modelos distintos de solicitude a un só, co obxectivo de mellorar a transparencia e a información e de facilitarlles e axilizar o proceso de peticións ás persoas interesadas. Ademais, a asignación de prazas do programa de minicampamentos Coñece Galicia, que antes se xestionaban por orde de inscrición, realizarase desta vez por sorteo, ao igual que os campamentos.

Campamentos e minicampamentos

A modalidade de campamentos, destinados a nenos e nenas de entre 9 e 17 anos, é a que oferta un maior número de prazas, 8.183, repartidas en 38 instalacións das 4 provincias, o que suma 266 máis con respecto ao ano pasado.  

Cunha duración de entre 8 e 12 días por quenda durante os meses de xullo, agosto e setembro, esta proposta bríndalle á cativada a oportunidade de gozar de actividades para divertirse e tamén encamiñadas ao seu enriquecemento persoal e vital. Trátase dunha iniciativa que tamén abrangue oferta en campamentos "noutras sete comunidades autónomas" e que no caso deste ano son "País Vasco, Extremadura, Castilla y León, Castilla-La Mancha, La Rioja, Madrid e Cantabria".

Por outra banda, nesta edición tamén se programan para a franxa de idade comprendida entre os 9 e 12 anos os minicampamentos Coñece Galicia, unha proposta lúdico- formativa con 779 prazas que se desenvolve nos espazos naturais da Comunidade cunha duración de 5 días, de luns a venres. Neste senso, os participantes, que optarán a 16 programas de estadías diferentes, aloxaranse en establecementos turísticos co obxectivo de favorecer as necesidades de conciliación e coidado das familias á vez que se fomenta o coñecemento da riqueza natural e patrimonial de Galicia.

Campos de voluntariado e actividades para maiores de 18 anos

"Para a mocidade de máis de 18 anos, e ata os 30, a Xunta oferta dúas iniciativas, os campos de voluntariado e un programa de actividades de lecer alternativo", explicou Rueda. No que respecta aos primeiros, contan con 600 prazas en 37 localizacións de Galicia, ás cales hai que sumar outras 75 prazas noutras comunidades autónomas e 75 máis no estranxeiro. 

Estas accións desenvólvense maioritariamente en colaboración cos concellos e pretenden favorecer a convivencia, a participación, a tolerancia e a solidariedade entre a mocidade e a súa contorna, a través da colaboración desinteresada e voluntaria en traballos diversos. Ademais, os participantes gozarán da práctica de deportes ou visitas a lugares de interese histórico e cultural. 

Por outra banda, este ano dáselle continuidade ao paquete de actividades específicas para maiores de 18 anos que se puxo en marcha no 2024 e que promove un lecer educativo, alternativo e saudable con 218 prazas en 8 instalacións. Cunha duración de entre 4 e 13 días, os obxectivos destas accións son mellorar as competencias e as habilidades da mocidade a través da educación non formal, de maneira que coñezan a xeografía e o patrimonio natural, cultural e etnográfico de Galicia, promovendo o seu respecto e posta en valor.

Ademais, este ano incorpórase como novidade unha reserva de prazas no programa Conecta con Galicia no Camiño, da Secretaría Xeral de Emigración, que ten por finalidade facilitarlles aos participantes o enriquecemento persoal a través da convivencia con outros mozos galegos de diferentes orixes.

Instalacións xuvenís

Ademais da oferta directa de prazas da Consellería de Cultura, Lingua e Xuventude, a campaña de verán tamén inclúe o uso das instalacións xuvenís por parte de asociacións, entidades prestadoras de servizos á mocidade, escolas de tempo libre, corporacións locais e outras entidades públicas ou privadas que leven a cabo plans relacionados cos mozos e mozas. A proposta, con 1.720 prazas e quendas de 5 a 10 días de duración, tamén está dirixida a grupos de mozos e mozas galegos non asociados que organicen actividades de tempo libre sen ánimo de lucro.