Un total de 300 rapaces e rapazas disputan en Narón o campionato provincial de dúatlon escolar ao abeiro do programa xogade
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
Narón (A Coruña), 27 de abril de 2025
A delegada territorial da Xunta en Ferrol, Martina Aneiros, participou esta mañá na entrega de premios do campionato provincial de dúatlon escolar que se levou a cabo no polígono das Lagoas, en Narón. A proba, organizada polo club AD Náutico Narón, desenvolveuse ao abeiro do programa Xogade (Xogos Deportivos Galegos en Idade Escolar) para o curso 2024/2025 que promove a Secretaría Xeral para o Deporte.
A representante da Xunta destacou a importancia da práctica deportiva nas categorías de base de cara a afianzar hábitos de vida saudables e trasladou as súas felicitacións non só aos gañadores das diferentes categorías (benxamín, alevín, infantil e cadete) senón aos 300 deportistas de preto dunha vintena de clubs da provincia clasificados nas fases previas que participaron na competición.
O programa Xogade agrupa toda a oferta deportiva e lúdica promovida pola Administración galega (escolar e federada) co obxectivo de levar a actividade a todos os concellos e brindarlle á rapazada a posibilidade de practicar e competir cos clubs e centros educativos de toda a comunidade galega. A de dúatlon é unha das 16 modalidades convocadas dentro da actividade deportiva escolar de Xogade este curso xunto ás de atletismo en pista, bádminton, baloncesto, balonmán, cros, encontros multideportivos, fútbol sala, multixogo 6-8 anos, natación, orientación, patinaxe artístico, tenis de mesa, voleibol, xadrez e xogando co atletismo.
