Galicia alíase con cinco rexións europeas nun proxecto que destinará 9,3 M€ a buscar solucións innovadoras de adaptación ao cambio climático

Santiago de Compostela, 19 de abril de 2025

Galicia participará xunto con outras cinco rexións e cidades europeas nun proxecto transnacional dirixido a buscar solucións efectivas e innovadoras para favorecer a adaptación ao cambio climático dos seus respectivos territorios e enfocadas nas necesidades existentes a nivel local e rexional.

Cun orzamento total de 9,3 millóns de euros —financiado con fondos europeos—, o denominado proxecto SystR porase en marcha no mes de maio e desenvolverase, ademais de en Galicia, no arquipélago francés de Guadeloupe; en Roma, Italia; na cidade eslovaca de Banksa Bystrica; na illa grega de Egaleo, e en Estrasburgo (Francia).

Para garantir o maior impacto posible do proxecto, que foi seleccionado na última convocatoria do programa marco para a investigación e a innovación Horizon Europe, todas as solucións que se propoñan se adaptarán e probarán en tres dos lugares participantes: Guadeloupe, Roma e Banksa Bystrica. Os proxectos piloto de adaptación que se leven a cabo neles, relacionados con olas de calor, sensibilización social e adaptación do turismo, entre outros, reproduciranse despois nas rexións coas que estean emparelladas para que validen os casos de éxito nos seus propios territorios. 

Esta metodoloxía baseada en dividir aos seis participantes para poder replicar as experiencias piloto asegurará unha aplicación e un impacto máis amplos xa que permite transferir con rapidez as solucións de máis éxito. No caso de Galicia, replicaranse as propostas innovadoras de adaptación creadas nas illas Guadeloupe, en concreto, para previr ou minimizar a posible incidencia do clima sobre o turismo de costa xa que ambas rexións comparten un carácter eminentemente costeiro e tamén son zonas turísticas.

Grazas a este proxecto, ademais, a Xunta pasará a integrarse nunha ampla rede internacional que traballa a prol da adaptación ao quecemento global, artellada arredor dun consorcio composto por 28 entidades de distintos países da UE entre as que figuran centros de investigación de prestixio, varias universidades —incluída a Universidade de Vigo—, asociacións medioambientais e entidades gobernamentais.

Sobre elas recaerán, precisamente, as distintas tarefas a desenvolver durante os catro anos de duración do proxecto (ata xuño de 2029). En concreto e para acadar o obxectivo de resiliencia ante o cambio climático a nivel local e rexional, crearase unha ferramenta de apoio á adaptación que agrupará diferentes sectores, obxectivos e solucións; deseñarase un marco de traballo comunitario que mobilice á sociedade, e probaranse solucións que aborden os retos do clima e as súas vulnerabilidades e riscos sistémicos.

Así mesmo, os membros do consorcio abordarán a creación de esquemas de gobernanza que melloren a cooperación a múltiples escalas e follas de ruta financeira para garantir a captación de fondos. Por último, tamén deseñarán solucións integradas de resiliencia baseadas na natureza, en liña cos obxectivos da infraestrutura verde.

No caso de Galicia, será a Dirección Xeral de Enerxías Renovables e Cambio Climático a encargada de impulsar as accións necesarias para replicar na comunidade as solucións climáticas que se deseñen para as illas Guadeloupe, en coordinación co resto de socios.