A Xunta lembra que está a facer o maior investimento da historia para optimizar e prestar a mellor asistencia aos pacientes

Santiago de Compostela, 6 de abril de 2025.- A Consellería de Sanidade lembra que Galicia dispón do maior orzamento sanitario da historia para optimizar e prestar a mellor asistencia ás persoas usuarias da sanidade pública.

O conselleiro de Sanidade, Antonio Gómez Caamaño, remarcou que respecta o dereito á manifestación das persoas que secundan a convocatoria deste domingo, pero aclara que os argumentos esgrimidos carecen de base real, como acreditan os datos.

Non é certo que haxa recortes na sanidade pública

O Orzamento do Servizo Galego de Saúde aumentou un 45 % en relación co que aprobou o Goberno bipartito para 2009. A Xunta destina cada ano máis de 5.000 M€ á sanidade pública, en concreto, 5.450 M€ neste 2025, o que representa o orzamento máis alto da sanidade pública da historia da autonomía, que medra tanto en atención primaria como en atención hospitalaria. Ademais de investimento en hospitais e centros de saúde, destaca o incremento do persoal: hoxe a sanidade pública galega conta con máis de 45.000 profesionais contratados, cando en 2008 había 36.256.

Non é certo que aumente a concertación coa sanidade privada

O Consello de Contas resalta no seu último informe que o gasto do Servizo Galego de Saúde en acordos para a prestación sanitaria especializada con medios alleos mantén estable o seu peso orzamentario nun 4,6%. Durante o goberno bipartito esta cifra aumentou un 48 % ata superar o 6 % do gasto real total.

Tampouco é certo que aumenten as listas de espera

Galicia reduciu no ano 2024 os tempos de acceso con respecto ao ano anterior, tanto en cirurxía como en consultas e probas diagnósticas. E fíxoo, ademais, ao mesmo tempo que incrementaba a actividade, superando por primeira vez nun ano o limiar das 200.000 intervencións, e ao tempo que potenciaba a atención a patoloxías prioritarias.

Grazas ao esforzo continuo da Consellería de Sanidade, Galicia conta cunhas das esperas medias máis baixas do Estado. Para cirurxías, o tempo medio de espera en Galicia sitúase en 67 días, máis de 2 meses por debaixo da media española -128 días-; e para consulta co especialista o tempo de acceso en Galicia está en 60 días, o que representa 12,5 días menos que o ano antes e máis de 30 días menos que a media estatal.

A sanidade pública galega, á vangarda

O conselleiro de Sanidade, Antonio Gómez Caamaño, incidiu en que Galicia conta cunha das mellores sistemas sanitarios públicos do mundo.

Explicou que a comunidade é referente no tratamento contra o cancro: conta cun Centro de Fabricación de Terapias CAR-T e avanza nas obras do Centro de Protonterapia, que en 2026 será o primeiro de España en atender pacientes na sanidade pública.

Lembrou, ademais, que Galicia está á vangarda en cribados de cancro, cos de mama, colon e colo de útero. No de mama, Galicia foi a primeira comunidade Autónoma en ampliar a poboación diana e citar para mamografía a mulleres de 74 anos. Na actualidade desenvolve de forma pioneira proxectos piloto de cribados de cancro de pulmón e de próstata para detectar a enfermidade en estados iniciais para mellorar o prognóstico.

Galicia tamén conta co calendario de vacinación máis completo do mundo. É dicir, co maior número de vacinas financiadas pola sanidade pública, tanto para poboación infantil como adulta.

A grande aposta da Xunta pola saúde pública reflíctese na resposta da poboación e Galicia conta cada ano coas taxas de vacinación fronte a gripe máis altas do Estado con máis do 70 % dos maiores de 65 anos vacinados, o que supón que en determinadas franxas de idade Galicia supera en máis de 20 puntos a media nacional.

Gómez Caamaño lembrou que o maior problema da sanidade pública en toda España é a falta de profesionais en determinadas especialidades como medicina de familia e pediatría e que a competencia para dispoñer de máis médicos para seren contratados é do Ministerio de Sanidade, tal e como veñen reclamando a maioría das comunidades autónomas de España.