Galicia presenta á Comisión Europea a súa aposta pola supercomputación, a cuántica e a intelixencia artificial
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- Estas tecnoloxías, definidas como de alto impacto, teñen capacidade para promover unha transformación profunda e acadar un impacto económico relevante
- A cuántica e a IA son eixos estratéxicos transversais do Plan galego de I+D+i, en liña coa estratexia europea para reforzar a soberanía tecnolóxica e a competitividade
- Román Rodríguez tamén se reúne con representantes do Parlamento Europeo e da Representación Permanente de España na UE para abordar temas vinculados á I+D+i
Estas imágenes pertenecen a Página Oficial de la Xunta de Galicia
Bruxelas, 27 de marzo de 2025
O conselleiro de Educación, Ciencias, Universidades e Formación Profesional, Román Rodríguez, mantivo hoxe unha reunión de traballo en Bruxelas co director adxunto da Dirección Xeral de Redes de Comunicación, Contidos e Tecnoloxías da Comisión Europea, Thomas Skordas, para presentarlle a aposta que está a realizar Galicia pola supercomputación e as tecnoloxías profundas, como a cuántica e a intelixencia artificial, e as actuacións que se están a desenvolver neste eido.
No marco da súa visita a Bruxelas, onde estivo acompañado pola directora da Axencia Galega de Innovación, Carmen Cotelo, o conselleiro trasladoulle ao representante da Comisión Europea os importantes investimentos que está a realizar Galicia nestas áreas, como o computador cuántico Qmio do Centro de Supercomputación de Galicia (Cesga) ou a ampliación do Cesga cun investimento de 56 M€ en marcha. Así mesmo, destacou o desenvolvemento da Comunidade na I+D+i ao redor destas tecnoloxías, que están a usar estas infraestruturas en beneficio do avance do coñecemento e da súa aplicación.
O titular de Ciencia afirmou que Galicia conta cos medios para situarse como un territorio destacado no marco europeo nos eidos da cuántica e da intelixencia artificial, grazas ás medidas que se están a impulsar e aos investimentos históricos realizados. De feito, estas tecnoloxías son eixos estratéxicos transversais do novo Plan galego de I+D+i 2025-2027 e consideradas de alto impacto polo seu potencial para contribuír a unha transformación profunda do tecido produtivo e a súa contribución ao avance da I+D+i e o desenvolvemento do sector. Con esta aposta, preténdese, polo tanto, seguir contribuíndo a reforzar a soberanía tecnolóxica de Europa desde o sur do continente.
Outros encontros con representantes europeos
Román Rodríguez tamén mantivo outras reunións de traballo na capital belga con representantes europeos para tratar temas vinculados coa ciencia e a innovación. Concretamente, reuniuse coa eurodeputada da Comisión de Innovación Eva Meydell e co eurodeputado da Comisión de Mercado Interior e Protección dos Consumidores Andreas Schawab. Así mesmo, Román Rodríguez mantivo un encontro con membros da Representación Permanente de España na Unión Europea (REPER) vencellados ao ámbito da investigación e a innovación, como o conselleiro de Ciencia e Innovación, David González, e a conselleira de Asuntos Autonómicos, Florencia Cuervo.
